Pisinnaatitaaffeqarpunga!

Meeqqat atuarfianni atuakkap nutaap meqqat pisinnaatitaaffiinik ilitsersuisussaq atuarfinnut nassiussuunneqarpoq

Meeqqanut atuakkiap nutaap saqqaa taamak isikkoqarpoq, taanna atorlugu atuartut pisinnaatitaaffinnik ilitsersuunneqassapput.

Piffissami matumanerpiaq Kalaallit Nunaanni meeqqat atuarfiinut akeqanngitsumik nassiussuunneqarluni aallartippoq FN'ip Meeqqat pisinnaatitaaffiisa pillugit isumaqatigiissutaanik atuakkiaq, atuaqatigiiaanut atugassaq ilinniartitsisunullu ilitsersuut, tamarmik qulequtallit "Pisinnaatitaaffeqarpunga"!

Siornatigut ingerlanneqartoq MIO, Meeqqat Inuusuttullu pillugit ilisimasaqarfik - aamma ICC Greenland, Inuit Circumpolar Council atuarfimmi ilinniusiamik atorneqartussamik suliarinnittuupput. Atortussat kalaallisut qallunaatullu suliaapput meeqqat atuarfianni akullernik atuartitsinermi atorneqartussaalluni. Suliniummut aningaasaleeqataavoq Ilaqutariinnermut, Kultureqarnermut, Ilageeqarnermut aamma Naligiissitaanermut pisortaqarfik.

Ilinniusiap siunertaraa Kalaallit Nunaanni meeqqat pisinnaatitaafimminnik ilikkarnissaat soorlu FN'ip Meeqqat pillugit isumaqatigiissutaa naapertorlugu taamattoq. Meeqqat pillugit isumaqatigiissummi sammineqarput pisinnaatitaaffiit meeqqanut tunnganerusut. Pisinnaatitaaffiit unioqqutinneqannginnissaat qulakkeerniarlugu pingaaruteqarpoq meeqqat inersimasullu tamakkuninnga ilisimasaqarnissaat.

Meeqqat pillugit isumaqatigiissummi immikkoortortat arlallit atuakkami sammineqarput qulequttanut pingaarnernut arfinilinnut oqaluttuaaqqanik akullugit immikkoortitikkat. Oqaluttuat tamarmik aalajangersimasunik naliliiffigineqartussanik imaqarput, oqaluttuami assersuummi pisinnaatitaaffinnik atuaruminartunngorlugit akissutissartaqarlutik. Oqaluttuat tamarmik meeqqat atuarfiini akullerni atuartunit assiliartalersugaapput.

Ilinniartitsisunut malitassiami ilinniartitsisut atuartut pisinnaatitaaffiinik ilinniartitsinissaanut siunnersuuteqarpoq.

Taanna ilaatigut suliarineqarsinnaasutut oqallinnernilu apeqqutigineqarsinnaasunik siunnersuuteqarpoq. Tamatuma saniatigut isumaqatigiissut tamakkiisoq tassani naqissimavoq aamma imaqarniliugaq. MIO'mi aamma suliarineqarsinnaasut allat siunnersuusiorfigineqarput taakkua nittartakkami mio.gl ivertinneqartassapput.

Powered by Labrador CMS