Nuummi Jule Cupimi unammeqataasussat

Danmarkimi assammik arsartartut angerlarlutik juullisioriartussat kikkuunerat Aqqaluk Sørensenip Århus GF-imeersup paasisimalerpaa

Karl-Frederik Frederiksen assammik arsartartunut Danmarkimi ilinniagaqartunut juullisioriartussanullu taamalu Brugsens Jule Cupimut peqataasussanut ilaavoq. Asseq toqqorsivimmit: John Jakobsen

Juulli qanilliartorasuarpoq Danmarkimilu ilinniagaqartut amerlanerpaartaat nunatsinnut angerlarlutik ilaquttaminnut juullisioriarnissaminnut bilitsinik inniminneereersimalerput. Juullisioriarlutillu angerlarsimanerminni qasujaassusertik aamma attatiinnarniartussaavaat.

Danmarkimilu ilinniagaqartut tamarmik unammisartoqatigiinnut QNQ-mut assammik arsarnermi Brugsenip Jule Cupianut unammeqataasussamut katersorneqarnermikkut. Aqqaluk Sørensen assammik arsartartunik angerlarlutik juullisioriartussanik katersisuuvoq. Arnanillu unammeqatigiittussanik inuttalersuiniarneq ajornakusoorsimasoq angutini ajornannginnerulaarpoq.

Angutit unammeqatigiittussat ukuupput: Patrick Frederiksen, Aqqaluk Kreutzmann, Kuluk Lorentzen, Inuk Olsen, Karl-Frederik Frederiksen, Mads Lyberth, Nuka Ivik Sarkov, Inuk Osterman Sørensen, Nukappiaq Dahl Thorleifsen aamma Aputsiaq Bjerge.

Arnat unammeqatigiittussat maannamut assammik arsartartunik sisamanik pissarsisimapput, taakkualu tassaapput Pani Johnsen, Ivalu Frederiksen, Ria Hansen Jensen, aamma Paninnguaq Broberg Magnussen. Danmarkimi aamma arnanik ilinniagaqartoqarpoq Nuummut juullisioriartussanik, taakkualu suli peqataasussatut nalunaarsimanngillat, tamannalu Facebook aqqutigalugu Aqqaluk Sørensenimut pisinnaavoq. Brugsens Jule Cup decembarip 16-iani aallartissaaq.

Powered by Labrador CMS