Kalaallit Nunaata aatsitassanit iluanaarutissani pinngitsoorsinnaagai
Nunat tamalaat ingerlatsiviutaat Kalaallit Nunaanni akileraarutinik akiliuteqartanngeratarsinnaapput nunani akileraarfiunngitsuni allanik ingerlatsiviuteqarnertik tunngavigalugit
Kalaallit Nunaata milliardilikkaat aatsitassarsiorfinnit annaasinnaavaat pissutigalugu nunat tamalaat akornanni ingerlatsiviit aatsitassarsiorlutik ujaasisut aatsitassarsiorfinnilluunniit ammaangajalersut, nunani akileraarfiunngitsuni allanik ingerlatsiviuteqaramik.
Politiken taamak allappoq.
Aviisip aatsitassarsiorfiit piginneqatigiiffittut aaqqissuussaanerannik misissuisimapput. Misissuinermi ilaatigut paasineqarpoq, aatsitassarsiornermik ingerlatsivik London Mining, ungasinngitsumi Nuummi savimminissiorfimmik ammaalersoq qanittumi piginnittuminik allanngortiterisimasoq.
Maannakkut London Miningip Kalaallit Nunaanni ingerlatsiviutaa Jerseymi Tuluit Ikarasaliaanniittumi nunami akileraarfiunngitsumi ingerlatsivinnik marlunnit angerlarsimaffeqartumit pigineqarpoq. Ingerlatsiviup aappaa nunamik akileraarfiunngitsumi angerlarsimaffeqartoq tassaavoq Greenland Minerals & Energy, taanna Kalaallit Nunaata Kitaani ujaqqanik aatsitassanik qaqutigoortunik akulinnik aamma uranimik annertuumik nassaarnikuuvoq.
- Aatsaat siullermeerlunga paasissutissat taakku tusarpakka. Sianiitsuunngilagulli. Nalunngilarput taamannak ingerlatseqatigiiffinnik aaqqissuisoqartartoq, Inatsisartuni inuussutissarsiornermut ataatsimiititaliami siulittaasoq Naaja Nathanielsen, naalakkersuisut partiiannit IA-meersoq aviisimut oqarpoq.
Kalaallit Nunaanni illuatungiliuttut partiiata Siumut siulittaasua Aleqa Hammond, politikkikkut qanoq iliuuseqartoqarnissaanik ujartuivoq.
Ernumanartorujussuuvoq London Miningip nunamit akileraarfiunngitsumit aallaaveqarluni suliniarnera. Danmark nunallu allat ingerlatsivinnik nunat tamalaat akornanni pigineqartunik akileraarsitsiniaallutik ilungersuuteqarput, tamakku nunanit akileraarfiunngitsunit aallaaveqartillugit, Politikenimut oqarpoq.