Aatsitassat qaqutigoortut: Mingutsitsineq mianersorfigisiuk
Margrete Auken, MP, Kalaallit Nunaanni ujaqqanik aatsitassanik qaqutigoortunik akulinnik piiaanissaq Bruxellesimi ataatsimeersuarnermi oqaluuserissavai
Ataasinngornermi unnukkut Europa-Parlamentetimi piujuartitsineq aallaavigalugu suleqatigiit Margrethe Augen siuttoralugu Kalaallit Nunaanni aatsitassarsiornissaq aamma piujuartitsineq aallaavigalugu Issittumi aatsitassarsiornissaq oqaluuserissavaat.
Tamanna Bruxellesimi ataatsimeersuarnermi pissaaq.
Issittumi sakkortuumik mingutsitsineq pinaveersaarneqarli ujaqqanik aatsitassanik qaqutigoortunik akulinnik piiaanerup kingorna, Margrethe Augen, ilaatigut kaammattuivoq.
- Nunarsuarmi tamarmi Issittumi isumalluutinik aatsitassanillu qaqutigoortunik piumasorujussuupput - piujuartitsineq aamma avatangiisit mingutsinneqannginnissaat aallaavigalugu aatsitassarsiornissaq ingerlakkumaneqartoq unammillernarpoq anguneqarsinnaallunili, Margrethe Auken oqallisissiami allaaserisamini kingullermik oqarpoq.
- Juuli qaammat Europa-Kommissionimi siulittaasup tulliata Antonio Tajani Kalaallit Nunaannik aatsitassat pillugit suleatigiinnissaq isumaqatigiissutigineqarpoq. Taamatuttaat Kina naalagaaffiillu allat angisuut Nuummi naalakkersuisunik isumaqatigiissuteqarniarsaripput. Naatsorsuutigineqarpoq Kalaallit Nunaannit ukiut tullii 50-it nunarsuup aatsitassanik pisariaqartitaasa 20 procentii piiarneqarsinnaassasut, Margrethe Auken allappoq.
Pinngortitaq aallaavigalugu ineriartorneq
Aningaasaqarnermut Naalakkersuisut Maliina Abelsen, IA, atorfilittat Europa-Kommissionimeersut inuussutissarsiornermi aamma tunisassiornermi aqutsisoqarfimmeersoq Mattia Pellgrine peqatigalugu oqalugiartunut ilaassapput unnuup ingerlanerani Issittoq pillugu oqallinneq aallartippat.
Pilersaarutit ilaanni Damien Degeorges, frankrigimiu ilisimatusartoq Ilisimatusarfimmut attuumassutilik Kalaallit Nunaata Issittumi inissisimanera pillugu oqalugiassaaq.
- Aaqqissuussineq aqqutigalugu naatsorsuutigaarput paasisitsissalluta aamma Issittumi aatsitassarsiorneq aallartileraluttuartoq oqallisigissallugu. Ingasaallugu oqaatigissagutsigu kissaatigaarput ineriartorneq pinngortitaq aallaavigalugu ingerlassasoq aamma pinngortitaq misilliasoq mianersorfigeqqissaarlugu ingerlanneqassasoq, Margrete Aukenip Bruxellesimi allaffianit Sermitsiaq.AG.-mut ilisimatitsipput.
Aatsitassarsiortut kisimik iluanaassapput
- Misilittakkanit ilisimaneqarpoq aatsitassarsiorneq mianersorfiginngikkaanni, aatsitassarsiortunut tunisassiorneranni sakkortuunik piumasaqaatitaqartitsigani pinngortitamik aseruilluinnartarput, ingerlatsivinnillu piginnittut kisimik iluanaaruteqartarlutik, kalaallit iluanaartinnagit taakkualu kingorna kiserngorutissapput piitsuullutik nunaallu aserugaasimassalluni, Margrethe Augenip allaffianit taamannak oqartoqarpoq.
Europa-Parlamentetimi partiit arfineq-marluupput. Margrete Auken pinngortitamik illersuiniat akornanni Europa-Parlamentetimi ilaasortaavoq. Danmarkimi SF tunuliaqutaralugu qinerneqarpoq.