Kræftertut imminnut tapersersorniarput

Sisimiuni Neriuffiup kræftimik eqqugaasunut tapersersuisoqatigiinnik pilersitsiniarpoq. Kræftimik eqqugaasut, katsorsarneqartut imaluunniit katsorsarneqareersimasut decembarip 3-anni Innuttaasut Illuanni naapeqatigiissapput

- Immitsinnut ikiornissatsinnut atorfissaqartitsivugut, Eva Mølgaard oqarpoq. Ass.: Paninnguaq Fleischer-Lyberth

- Immitsinnut ikiornissatsinnut pisariaqartitsivugut, kræftimik eqqugaasut oqarput.

Ukiut tamaasa arnat angutillu amerlasuut kræfteqalersarput. Amerlasuut kræfti toqussutaasussatut isigisarpaat. Ullumikkulli kræftimik eqqugaasut amerligaluttuinnartut nappaat anigortalerpaat. Tamakkua ilagaat Eva Mølgaard, taannalu taamaaqatiminik naapitsikkusuppoq.

Taamaattumik Neriuffik suleqatigalugu decembarip 3-anni nalunaaqutaq 19.00 Innuttaasut Illuanni ataatsimiinnissamik aaqqissuussivoq.

- Nalunngilluarpara amerlasuut nappaammik kræftimik naalliuuteqartut, kræftertut ilaqutaallu. Kissaatigaarali gruppi taanna napparsimasunut atuutissasoq, immitsinnut ikiorniassagatta tamattalu misigissutsivut ernumassutivullu paaseqatigiissutigalugit.

- Takorloorpara akunnerup aappaata affaa siulleq atorneqassasoq nammineq misigissutsinut oqaloqatigiinnermut, akunnerullu affaa kingulleq oqilisarniarluni illaqatigiilaarnermut, immitsinnut qimannginnitsinni, Eva Mølgaard oqaluttuarpoq.

Taavalu utaqqissaatit
Eva Mølgaard siorna kræftimik eqqugaavoq. Takorloorsimanngilluinnarpaa qanoq erloqinartigissasoq.

Siullermik misissortissaatit, taavalu utaqqissaatit. Taava Rigshospitalimut aallartinneqassaatit misissortikkiartorlutit, taavalu utaqqissaatit. Taava pilatsissaatit, taavalu akissutissaanik utaqqeqqissaatit.

- Inuuneq allanngorluinnartarpoq. Siunissamut pilersaarutitit sinnattutillu aserorluinnarneqassapput. Qarmamut aporlunga misigisimasimavunga. Nalornisoqalersarpoq: Sumunngassaanga? Qularnanngivippoq inuit takorloorsinnaanngikkaat inuttut qanoq erloqinartiginersoq, nammineq atunngikkaanni.

Pilatsinnermi kingorna Eva Mølgaard kemoterapi-mik qinngornernillu katsorsarneqarpoq. Kemo-mik qinngornernillu katsorsarneqarnermut inuit qisuariartarnerat assigiinngitsorujussuuvoq. Evamulli qinngornernik katsorsartinneq ajornersaasimavoq, tarninganik sunniilluni.

Oqaloqatigiit

Eva nappaqqinniarluni oqaloqatiginnikkusuppoq, isumassarssioqatigiikkusulluni nukittorsaqatigiikkusullunilu.

Evap katsorsarneqarnera qaangiutereeraluartoq ajorunnaartutut nalunaarutigineqarsimanngilaq. Ullumikkut atorfimminit sulinngiffeqarallarpoq, misigisimagami sulileqqinnissani suli saperlugu.

- Napparsimalinnginninnit inuk allaanerujussuullungalu isiginninnikka allaanerujussuupput. Nammineq nunagisanni pisariaqartumik ikiorneqarsimanngilanga, napparsimanerullu ingerlarngata iliuuseqarfiginissaa suli pisariaqartillugu. Rigshospitalimi Kræftens Bekæmpelse-mit ikiorneqarnissannik tamanik ikiorneqarpunga, maanili taamatut ikiorneqarfissannik nassaarsinnaasimananga, Eva oqaluttuarpoq.

Eva misigisimavoq kræftimik nappaateqartutut misigisarpassuarnik oqaloqateqarnissaminik amigaateqarluni. Decembarmi marsimilu misissortinnissani suli amigaatigai. Taamaattumik suli ulorianartorsiorpoq.

- Isumaqarpunga sumiiffimmik amigaateqartugut, kræftimik napparsimasut naapissinnaaffiannik misilittakkanillu taarseeqatigiiffigisinnaasaannik. Isumaqarpunga pitsaassutsimik amigaateqartugut. Amerlasuut nappaammik atugaqarsimapput, soormi nukivut atoqatigiillugillu isumassarsioqatigiikkutta, Eva Mølgaard aperivoq.

Powered by Labrador CMS