Suliniussuarrnut inatsit allanngortinneqassaaq

Inuussutissarsiutinut Ataatsimiititaliaq allannguutissatut siunnersuutinik saqqummiussissaaq, suliniussuarnut inatsit sapaatip akunneri marluk qaangiuppata oqaluuserineqalerpat

Inuussutissarsiornermut Ataatsimiititaliaq suliniussuarnut inatsimmut allannguutissanik siunnersuuteassaaq, taanna decembarip 6-anni 7-annilu aappassaaneerneqarlunilu pingajussaaneerneqalerpat. Ass.: Leiff Josefsen

Ippassaq unnukkut nalunaarutigineqarpoq Inatsisartut ukiakkut ataatsimiinnerat sivitsorneqassasoq, taamaasilluni politikerit suliniussuarnut inatsit aatsitassanullu inatsimmut allannguutit aatsaat decembarip 6-anni 7-annilu aappassaaneerlugillu pingajussaaniissavaat.

Maannangaarli qularnanngereerpoq inuussutissarsiornermut ataatsimiititaliaq, isumaliutissiissumminik piareersaasoq, suliniussuarnut inatsimmi allanngutissatut siunnersuutinik saqqummiussiumaartoq:

- Maannangaaq aalajangiusimareerpoq inuussutissarsiornermut ataatsimiititaliaq allannguutissatit siunnersuutinik saqqummiussiumaartoq, siulittaasoq Naaja Nathanielsen, IA, tusagassiortunut nalunaarutikkut oqarpoq.

Atuaruk "Suliniussuarnut inatsimmut killissarititaq nutaaq"

Taassuma erseqqissarpaa inatsisip suliarineqarnera ´pimoorussamik, ingerlaannartumik pisariaqanngitsumillu tuaviuussinani´ ingerlasoq.

- Ataatsimiititaliap isumaliutissiissunni aatsaat saqqummiutissavaa suliarinninnini naammassereeruniuk, aammalu qularnartut tamarmik qulaajarneqareerpata. Allannguutissatut siunnersuutip imarisassai, isumaliutissiissutip qaqugu saqqummiunneqarnissaa aammalu isumaliutissiissutip imarisaa isumaqatigiissutigineqassanersoq isumaqatigiissutigineqassannginnersorluunniit ataatsimiititaliap maannangaaq oqaaseqarfigiumanngilai.

Aamma oqaatigimisaarpaa inuussutissarsiornermut ataatsimiititaliap piffissami aggersumi suut suliarissanerai:

- Inatsisissatut siunnersuummi paragraf-it ataasiakkaat, pingaarnerusumik siunertai inatsisissatullu siunnersuummi ajornartorsiutaasinnaasut inatsisissatullu siunnersuummut isornartorsiutit saqqummiunneqarsimasut inuussutissarsiornermut ataatsimiititaliap ilisimasaqarfigilluarpai. Ilisimasat tamakkua ataatsimiititaliap maanna suliarissavai.

Powered by Labrador CMS