Kalaalimineerniarfimmit eqaluit uumasut
Sisimiuni aalisartoq piniartorlu aappaagumiit illoqarfiup kalaalimineerniarfianit eqalunnik uumasunik tuniniaanermik aallartitserusuppoq. Iluatsilluassappat neriuppoq misileraaneq nunap sinneranut siaruaatissasoq
Sisimiuni innuttaasut illoqarfiup kalaalimineerniarfiani aalisakkanik nutaanik pisiniartillutik aalisartoq piniartorlu Marius Olsen eqalunnik suli uumasunik neqerooruteqarsinnaassaaq, knr.gl allappoq.
- Eqqaamasariaqarparput aasami kiattumi aalisakkat asiujasuararsuusut - aamma ulloq taanna pisaasimagaluarunilluunniit, Marius Olsen KNR.gl-mut oqarpoq.
Taamaattumik aalisakkat uumatillugit pisariniarpai kattarsuarni uumatillugit pisiarineqarnissaasa tungaannut.
Nalunaaqquttap akunneri arfineq-pingasut tikillugit uumatinneqarsinnaapput
Taanna nammineerluni misileraasimavoq eqalunnik pisaminik uumatitsilluni. Iluatsissimavaa eqaluit nalunaaquttap akunnerini arfineq pingasuni illoqarfimmi uumatinnissaat
knr.gl naapertorlugu suliniutip aallartisarnerani Qeqqata Kommuniata atuilluartuunissamik aningaasaateqarfiani aningaasaliiffigineqarpoq. Suliniutinut assigiinngitsunut aningaasat 100.000 koruunit ippassigami agguaanneqarpoq. Marius Olsenip suliniutaa baaliarsuarmik iltimillu silaannalersuummik pisinissamut 25.000 koruuninik tunineqarpoq.
Suliniut iluatsilluassappat sineriammut siaruaassinnaavoq, Marius Olsen oqarpoq:
- Eqqarsaatigineqarsinnaavoq bundgarnersornermi saarulliit uumatillugit pisat taamatut aamma Kalaaliaqqami tuniniarneqarsinnaanerat. Misileraanerput illoqarfiit allat aamma ilinniarfigisinnaavaat taamalu aalisakkanik uumasunik tuniniaasarneq atugaanerulersinnaalluni, Marius Olsen knr.gl-imut oqarpoq.