Raipon pinngitsaalisaalluni matuneqarpoq: Putin naammagittaalliorfigiuk
Greenpeacemit kaammattuutigineqarpoq, Ruslandimi oqartussaasut issittumi nunat inoqqaavisa ataanni suliniaqatigiiffimmik matusinerat naammaginagu ersersinneqassasoq
Soorlu sapaatip akunnerata siuliani paasinarsisoq, Ruslandimi issittumi nunat inoqqaavisa suliniaqatigiiffiat Raipon russit pisortaannit matuneqarsimavoq. Pinngitsaaliilluni matusineq pivoq Raipon-imit qaammatialuit matuma siorna issittumi uuliasiorluni qillerinerit isornartorsiuinerisa kingorna.
Matusineq maanna Greenpeacekkunnik suliniummik anginngitsumik aallartitsinerannik kinguneqarpoq, avatangiisinut illersuiniaqatigiit inunnut nalinginnarnut kajumissaarutigalugu Putinimut mail-imik nassiusseqqullugit, piumasaqaatitalimmik taassuma Raiponimik matusinini 2013-imi apriilimut kinguartissagaa.
Sapaatip akunnerani qaangiuttumi Greenpeace nammineq qisuariariaateqarluni russit præsidentiannut allappoq, avatangiisinut illersuiniaqatigiit pisortaa Kumi Naidoo, issittumit sinniisorititat atorunnaarsitaanerat ajuusaarutigalugu.
- Raipon-imit ataavartumik isornartorsiutigineqarpoq Issittumi uuliasiorluni qillerinerit annertoorujussuarmik mingutsitsinerat, suliniaqatigiiffik imaluunnit ilaasortat aamma aatsaat taamannak pineqalinngillat, russit oqartussaasuinnit assut ajortisaarneqartarsimapput. Nipangersimaannarsinnaanngilagut Ruslandip innuttaasuni naqisimatissappagut isornartorsiuinerat pissutigiinnarlugu. Præsident Putin nalunaarfiginiarsiuk maannakkorpiaq piumasaqarlusi aalajangiussaminik utertitseqqullugu, Greenpeacemit ilaatigut taamak nipeqarpoq.
Ilaatigut Inuit Ataqatigiit, Siumut aamma ICC kaammattuuteqarput sukkanerpaamik arlaannik inerniliisoqaqqullugu.
Aana Greenpeace aqqutigalugu Putininut allaffissaq