- Amerlanerit nunarput tusaaniarpaat

Nunatta suliassaqarfiit amerlanerit akisussaaffigileriartoraat nammineernerulerlunilu Dnamarkimik suleqateqarnerunissaq pisariaqalerpoq, Kuupik Kleist sisamanngormat Ilisimatusarfimmi oqarpoq

Kuupik Kleist: - Ineriartorneq nutaaq ukiuni qulini utaqqisinnaanngilarput. Aallartittariaqarpaugut. Foto: Leiff Josefsen

Nunanut allanut ministeri Villy Søvndal, SF, naalakkersuisullu siulittaasuat Kuupik Kleist, IA, ullumi sisamanngornermi Ilisimatusarfimmi naapipput Issittumi ineriartorneq pillugu oqallinnermi 'Issittup ukiui' qulequtaralugit.

Qulequtaq Kuupik Kleistip nersualaarpaa tassaammat taannarpiaq piffissamut inissisimaffitsinnut tulluarmat, pissaanerup oqimaaqatigiinnera aningaasaqarnikkullu pissaanerup nikinneranni.

Marluullutik isumaqarput nunarput isiginiarneqartariaqartoq.

- Kalaallit Nunaata pingaassusaa annertusiartorpoq amerlanerillu Kalaallit Nunaata nipaa tusaaniarlugu, Villy Søvndal oqarpoq.

- Danmark ineriartornermi kalaallit tikiligaanni ikiuukkusullunilu tapersersuerusuppoq, kalaallillu kajumissaarpakka Danmarkip neqeroornera atorluaqqullugu, Villy Søvndal oqarpoq.

- Ikioqatigiinnissarput kajumissaarutigissavara, ataatsimoorlutami soqutigisaraarput, nunanut allanut ministeri oqarpoq.

Læs "Villy Søvndal klar til grænseforhandling med Canada"

Kuupik Kleist akivoq soqutiginartuusoq kalaallit namminersuleriartortillugit suliassani nutaani suleqatigiinnissaq pisariaqarnerujartormat:

- Soqutignarpoq isummersuut Minik Rosingilu marlunngormat Politikenimi allatarput (tallimanngormallu Sermitsiamiittoq, aaqq.) suliffissuarnut soraarnerussutisiaqarnermullu aningaasaateqarfinnut nunatsinni aningaasaliinissamut periarfissanik isiginialersitsimmat. Suleqatigiinnissamut aningaasaliinissanullu ammajuarsimavugut, tamannalu nutaartaqanngilaq. Inuppassuili tassanngaanaq paasilerpaat iliuuseqanngikkunik Asiami nunat pissaanilissuit soqutiginnimmata. Kinallu aatsitassat qaqutigoortut eqqarsaatigalugit kisermaassisutut inissisimanera nukittunerulersinnaavoq allat sorutiginninngippata. Piumasaqaatigaarput aatsitassat nunatsinni aaneqartut niuerfimmi killilersungaanngitsumi tuniniarneqassasut. Europamili suliffeqarfiit namminneq suliniuteqartariaqarput peqataaniarunik.

- Ima periarfissagitsiginngilagut ukiuni qulini utaqqisinnaalluta Europami suliffeqarfiit eqeernissaat utaqqillugu. Pissutsit ilungersunartut atorpavut suliffissaaleqineq annertusiartorluni, aalisakkat ikiliartorlutik, atugarissaanermullu aningaasartuutit amerliartorlutik, taamaattumillu utaqqisinnaanata, Kuupik Kleist oqarpoq.

Tallimanngornermi Sermitsiap Kuupik Kleistip Minik Rosingillu isummersuutaa saqqummersissavaa. Aviisi aamma uani pisiarisinnaavat:

Powered by Labrador CMS