Akisussaassuseqannginnermik malunnaateqarpugut
Universitetimi nalunaarusiami ukiunik arfineq-pingasunik pisoqaassusilimmi Kuupik Kleistip inuiaqatigiit eqqarsaariaasiat sakkortuumik avoqqaaraa. Akisussaassuseqannginneq kinguaariinniit kinguaariinnut ingerlateqqinneqartarpoq.
Oqaluttuarisaaneq politikerinik qangaanerusoq isummanik uissuumminartunik kingorna peqqissimissutigisaminnik saqqummiussisimasunik assersuutissanik ulikkaarpoq.
Apeqqutaavoq naalakkersuisut siulittaasuat Kuupik Kleist politikerinut oqaasissaminnik mianersuaatsunut peqqissimasunut ilaalersimanersoq?
Nunatsinni ilinniagaqarnersiutit pillugit allaaserisassamut paasissutissanik AG-p katersineranut atatillugu Kuupik Kleistip 2004-mi Inuit Ataqatigiit sinnerlugit Folketingimut ilaasortaanermini apeqqarissaarfigineqarnera nassaaraarput.
Tassani Kuupik Kleist ilaatigut oqarpoq 'saqqummeriaaseq erseqqinnerpaaq tassaagunarpoq kalaallit amerlanerpaartaasa ullumikkut inuunerminnut akisussaaffimmik tigusisannginnerat. Tassa tamanna samani itisooq tikillugu atuuppoq. Tassa ukiut 200-t qassiugaluarnerpullu ilaatigut nunasiaataannerup, ilaatigut Danmarkimut ilaanerup kingorna ukiunilu 25-ni namminersornerunermi suli arlaannit isumagineqartussatut eqqarsariartaaseqarluni inuusoqarpoq. Tamannalu eqqumiikkaluaqisumik inuit tarningannut aalajaatsumik tunngaveqartoq oqaatigingajappara'.
Kuupik Kleist qinnuigineqarpoq nunaqqatiminut akisussaassuseqanngitsunut isiginnittaatsini itisileqqullugit imalu akilluni:
- Isumaqarpunga akisussaassuseqannginnerujussuaq politikkimi innuttaasunili inuunermi nalinginnaasumi malunnaateqarluartoq.
Kuupik Kleistip 2004-mi oqaasiisa sinneri AG-mi sapaatip-akunnerani matumani saqqummersumi matuma ataani pisiarisinnaasanni atuakkit.