Juullip inuata allakkat akiortorpai

- Allakkanik akissuteqarluta ulappuseruttorpugut, Qaasuitsup Kommuniani pisortaq Lars Lennert Sandgreen oqaluttuarpoq, allakkanillu akineqartussanik poorsuarnik arfinilinnik tikittoqareersimanera ilisimatitsissutigalugu.

Ilulissani atuarfinni marlunnni Atuarfik Jørgen Brønlundimi aamma Atuarfik Mathias Storchimi atuartut klassit angajulliit nissiaqqatut ikiortaallutik nunarsuarmi meeqqat Kalaallit Nunaanni juullip inuanut naluneqanngitsutut Nuuk Tourismip ajalusoornerata kingorna Ilulissanut nuussimasumut allagaasa akissuteqarfigineqarneranni ikiuutissapput.

- Juullip inuanut allassimasut tamaasa oqaatsit pingasut atorlugit allaffigissavavut. Akissutigineqartut kalaallisut, qallunaatut tuluttullu allanneqassapput, Qaasuitsup Kommuniani Inuussutissarsiornermut, Aatsitassanut Takornariaqarnermullu pisortaq Lars Lennert Sandgreen oqaluttuarpoq.

- Allakkani juullip inuata nittartagaanut novembarip 25-ani nutarterneqartumut innersuussuteqassaagut, ilisimatitsivoq.

- Allakkat tamarmik juullertinnagu akineqassapput, Lars Lennert Sandgreen neriorsuivoq.

Suliassaq siorna Ilulissanit tiguneqarpoq allagaqarporlu ukiunit arlalinneersunik akineqarsimanngitsunik.

- Tamakkua tamarmik akineqarput.

- Tamanna 125.000 koruuninik uatsinnut akeqarpoq. Ukioq manna aningaasanik sipaarsinnaanerput kiisalu 70.000-80.000 koruunit atorlugit suliaqarsinnaanerput neriuutigaarput. Arlaannaanniilluunniit ikiorneqanngilagut. Namminersorlutik Oqartussanut aningaasanik qinnuteqaraluarpugut isumaqaratta Kalaallit Nunaata juullip inuata nunaatut nittarsaannissaa nunatta nunatut suliassarigaa, kisianni itigartinneqarpugut, Lars Lennert Sandgreen ilisimatitsivoq.

Juullip inuata aallartitaqarfia

Juullip inuata aallartitaqarfia siulleq novembarip 29-ani Bornholmimi Nexømi ammarneqassaaq.

Bornholms Tidende novembarip 8-ani ”Kalaallit Nunaanni Juullip Inuata – misissueqqissaareerluni isumaliutiginneqqissaareerlunilu – imarpiup akiani sinniisoqarfimmik (aallartitaqarfimmik) allakkerittalimmik Nexømi politeeqarfitoqaasimasumi kusanartumi inissisimaffeqartumik pilersitsinissamik aalajangiussaqarsimaneranik nutaarsiassamik saqqummiussivoq. Aviisi naapertorlugu juullip inuata tamanna Søren Vestergaard Mikkelsenimut ilisimatitsissutigisimavaa, taassumalu nutaarsiassaq Tidendemut ingerlateqqissimallugu. Aviisi isumaqarpoq Søren Vestergaard Mikkelsen juullip inuanut Kalaallit Nunaanni Ilulissani qullersaqarfeqartumut kissalaartumik immikkuullarissumik attaveqartoq.

”Juullip Inua Bornholmimi attaveqarfeqarluarmat juullip inuata nunani allani aallartitaqarfiata siulliup Bornholmimi qanimut oqaatigalugu Nexømi pilersinneqarnissaa pissusissamisoorpoq, tamatumanilu politeeqarfitoqaq aallartitaqarfiup suliassaanik isumaginniffissatut piukkunnarluartuusoq”, Bornholms Tidende allappoq, ilisimatitsissutigalugulu juullip inuata nunani allani aallartitaqarfiata siulliup novembarip 29-ani nalunaaqutaq 16.00 pilersinneqarneranut atatillugu ammaanersiornermik naleqquttumik inuussutissarsiutinik ingerlatallit suleqataajumasorpassuillu isumaginnikkumaartut.

Malunnartitsiniarnermut atatillugu juullip inuata juullernissaanut niuffatsitsinera Nexømi Torvimi ammarneqassaaq tamatumanilu pisorpassuaqassalluni juullernissaanullu niuffatsitsinermi neqerooruterpassuaqassalluni, ilaatigut assiliaaqqamik juullip inuata nammineerluni akisassaanik qularnaveeqqutitalimmik nassiussinissamut periarfissamik.

Juullip inua pisortatigoortoq

Qaasuitsup Kommuniata ulluni aggersuni juullip inua pisortatigoortoq ilisaritinniarpaa. Juullillu inuata Qaasuitsup Kommuniani illoqarfiit ilaanni sapaassuarmi siullermi juullip orpianik ukiut tamaasa ikitsisarnissaa pilersaarutaavoq. Ileqquulersussaq tamanna ukioq manna Qasigiannguani aallarnerneqassaaq, taavalu tulliutissapput Aasiaat, Kangaatsiaq, Qeqertarsuaq, Uummannaq, Upernavik aamma Qaanaaq, taavalu Ilulissat tullinnguuteqqissallutik.

Qaasuitsup Kommuniani allaaserisat allat atuakkit susoqarnersoq takullugu. Tamanut akeqanngitsumik uani aasinnaavat: