Killeqarfiit Canadamik isumaqatigiinniutiginissaannut piareerpoq

Nunanut allanut ministeri Villy Søvndal SF-meersoq ullumikkut marlunngornermi nunatsinnut tikissaaq, naalakkersuisullu siulittaasuanik IA-meersumik Kuupik Kleistimik oqaloqatigiissutissat arlaqarput.

Nunatta Canadallu killeqarfiat ilaatigut oqaluuserineqassaaq. Killeqarfiimmi pillugit sapaatit akunnerani tullermi Canadamik isumaqatigiinniarnerit aallartissapput qallunaat nunanut allanut ministeriata Canadami nunanut allanut ministereqatini John Baird ataatsimeeqatigissallugu. Qallunaallu nunanut allanut ministeriata aaqqiagiinngissutip aaqqinnissaa qilanaaraa.

- Isumaqatigiinniarnerni ingerlalluarpugut. Canadaliassaanga isumaqatigiinniarnerit nangikkiartorlugit, isumaqarpungali inerniliinissamut siusippallaartoq. Suli naammassivinngilagut, nunanut allanut ministeri Villy Søvndal Folketingemi nunanut allanut politikeqarnermut ataatsimiititaliami ataatsimeereerluni Fagpressebureauetimut oqarpoq.

Suliat immikkoortut
Villy Søvndal aamma oqarpoq Tartupaluk pillugu isumaqatigiinniarnerit uani qaammammi naammassineqassasut naatsorsuutigineqarsinnaanngitsoq. Imaanili killeqarfiit Tartupalullu imminnut sunniuteqarsinnaasut.

- Suliat immikkorput kisianni sooqunami imminnut sunniuteqarsinnaallutik, aappaata ingerlalluarnera aappaanut sunniuteqarsinnaalluni, Villy Søvndal Fagpressebureauetimut oqarpoq.

Qeqertaq Tartupaluk pillugu aaqqiagiinngissuteqarneq 1973-mi aallartippoq. Danmarkip/nunatta Canadallu akornanni ukiorpassuarni isumaqatigiinniutigineqarsimavoq.

Killeqarfiit pillugit isumaqatigiinniarnissat Olsvigip qilanaarai
Folketingimi nunanut allanut politikkeqarnermut ataatsimiititaliami ilaasortap Sara Olsvigip IA-meersup killeqarfiit pillugit isumaqatigiinniarnissat qilanaarai.

- Isumaqarpunga naalakkersuisut nunanullu allanut ministerip akornanni attaveqatigiinneq ajunngitsuusoq. Nunatta Canadallu akornanni imaani killeqarfik inissinneqaqqaartussaavoq, taava Tartupalummut tunngasoq pissanganartoq tullinnguutissaaq.

- Siusinnerusukkut oqariartuutigineqarpoq soorunami nunat tamat akornanni isumaqatigiissutit tunngavigalugit isumaqatigiinniartoqassasoq. Tassani Issittoq tamarmi pineqarpoq, suleqatigiinnerullu pitsaasup ingerlaannarnissaa kikkut tamarmik soqutigisariaqarpaat, ingammik ataatsimoorluta suliassavut taama annertutigitillugit, Sara Olsviq Sermitsiaq.AG-mut oqarpoq.