Angajoqqaat qulaatiinnerlugit aalajangiipput

Kommuneqarfik Sermersuumi meeqqeriveqarnermut immikkoortortaq isornartorsiorneqarpoq, naak kommuni angajoqqaanit aaqqiissutissanik ujartuigaluartoq

Meeqqerivimmi Nukami angajoqqaat tusaaniarneqannginnertik maalaarutigaat, naak innuttaasunik ataatsimiisitsinerni arlalinni kommuni aaqqiissutissanik ujartuigaluartoq. Foto Leiff Josefsen

- Angajoqqaatut taamaallaat Nuummi angjoqqaanut meeqqerivimmiituutilinnut paasissutissanik nalinginnaasunik tigusaqarsimavugut tassani siunnersuutigineqarluni meeqqatta affaasa inissaat meeraaqqerivinngortinneqassasut. Paasissutissat tigoqqaaratsigik kommunimut saaffiginnissimagaluarpugut, taamaallaalli allakkat tiguneranut nalunaarfigaatsigut maalaaruterpullu isummerfiginagu, meeqqerivimmi Nukami angajoqqaat oqaaseqartartuat Gerth-Ole Larsen angajoqqaaniit tusagassiuutitigut nalunaarummi taama oqarpoq.

- Maalaarupput oktobari 24-ani 2012-mi nassiupparput sulilu paasissutissanik tigussaasunik pissarsisimanngilagut allannguiniarnerlu meeqqatsinnut qanoq kinguneqassanersoq paasinatigut. Paasitinneqannginnerput toqqissisimajunnaarsitsivoq, Gerth-Ole Larsen nangippoq tusagassiuutitigut Andreas Boysen-Kleistimit aamma meeqqeerivimmi Nukami meeqqerivimmiititaqartumi oqarpoq:

- Maalaarutitsinni pitsaasumik oqaloqatigiinnissamik neqerooruteqaraluarpugut, oqaloqatigiinnissarli ajornakusoorpoq kommunimit tusagaqarsimatinnata, oqarpoq.

Oqaloqatigiinnginnerup kinguneraa angajoqqaat meeqqamik qanoq pineqarnissaa ilisimanagu meeqqerivimmullu allamut nuutinneqassanersut. Angajoqqaat taamaallaat nalaatsornerinnakkut tusagassiuutitigut Kommuneqarfik Sermersuup pilersaarutai tusarsimavaat. Tusagassiuutit aqqutigalugit angajoqqaat paasitinneqarput meeqqat atualertarnerat tunngavigalugu meeqqerivinni inissat meeraaqqerivinngortinneqassasut.

Kommunilli nittartagaani allassimavoq tusarniaasoqarsimasoq, takuuk Iluarsiissutissat naliliiffigineqarput.

Aamma periarfissaqarpoq

Nukariinni inissamik kissaateqarneq

.

- Tusaaniarsimasuugunisigut allannguiniarnernilu ernumassutigut paasillugit aamma ilisimassagaluarpaat uagutsinnut suli meeqqerivimmi Nukami sisamanik tallimanillu ukiulinnik meeqqerivimmiititaqartunut pingaaruteqartoq inissat affaasa allanngortinnissaat. Ullumikkut gruppit akimorlugit meeqqat nuannersunik ineriartornissamullu aqqutaasunik ataatsimut sammisassaqartinneqartarput, soorlu eqaarsaarneq, nalunneq, atuakkanik atorniartarfimmi filmerneq kigutigissarnerlu pillugu sammisaqarlutik il.il. Meeqqerivik ingerlatsiviit ilagaat meeqqat ineriartornissaminnut pitsaasumik periarfissaqarfiat. Ernumassutigaarput allannguisoqarneratigut meeqqat ullumikkut Nukamiittut atugaat ajorseriassasut, Gerth-Ole Larsen oqaluttuarpoq.

Ukiorli manna septembarimi kommunip angajoqqaat aaqqiissutissanik siunnersuuteqarnissaat ujartorpaa; takuuk Meeraaqqerivimmit meeqqerivimmut inissanik nalimmassaanermi aaqqissuussineq.

Angajoqqaat sulfeqatigiiffiani utaqqisut ikilisarnissaannik anguniagaq paasisinnaavarput aaqqinniarneranullu peqataarusulluta, aaqqiissutissalli pillugit kommunimik suleqateqarnissaq maqaasivarput, tusagassiuutitigut nalunaarummi allassimavoq.

Powered by Labrador CMS