Isumaginninnermik siunertanut qinnuteqarnissamut killissarititaq nutaaq

Ilaqutariinnut, Kulturimut, Ilageeqarnermut Naligiissitaanermullu Naalakkersuisoqarfik paasissutissiivoq 2013-imi isumaginninnermut siunertanut tapiissutinik qinnuteqarnissamut nutaamik killissaliisoqartoq. Qinnuteqarnissamut killissarititaq marsip 15-iannit decembarip 15-iannut kinguartinneqarpoq.

Tapiiffigineqarsinnaasut tassaapput "Meeqqanik inuusuttunillu immikkut ittumik suliniutit" aamma "inunnut, kinguaassiuutitigut atornerlunneqarsimasunut immikkut ittumik suliniutit", tamakkualu ingerlanneqarnerannut tapiissutinik qinnuteqartoqarsinnaavoq. Tamatuma saniatigut "Pinaveersaartitsinermik ingerlatsinernut" qinnuteqartoqarsinnaavoq.

Taamatut tusagassiorfinnut nalunaarpoq naalakkersuisoqarfik.

Makkununnga qinnuteqarsinnaavutit
Ilaqutariinnut, Kulturimut, Ilageeqarnermut Naligiissitaanermullu Naalakkersuisoqarfik siunertanut assigiinngitsunut tapiissuteqarsinnaavoq,

Ingerlatsinermut makku tapiiffigineqarsinnaapput:
- Ilaqutariinnut centerit
- Ilaqutariit højskolii
- Angajoqqaanngortussanut pikkorissartitsinerit
- Ilaqutariinnut angajoqqaarsianut suliniutit

Aamma makku ingerlannerannut qinnuteqartoqarsinnaavoq:

- kinguaassiuutitigut atornerluinermut pinaveersaartitsinermik suliniutit, kiisalu atornerlunneqarsimasunut inersimasunngorsimasunut kingusissukkut kinguneqaatinik katsorsaanerit

Tamatuma saniatigut makku tapiiffigineqarsinnaapput:
- Misileraanermik aaqqissuussinerit isumaginninnermik siunertallit
- Perorsaanikkut neqeroorutit immikkut ittut, ornittakkat ilanngullugit
- Atugarliortuni inuttut ajornartorsiutit paasissutissiissutiginiarnerat
- Nuna tamakkerlugu piumassutsiminnik isumaginninnermi kattuffiit
- Qimarnguiit
- Atuarfimmi akaareqatigiissitsiniartoqarneq (skoleféordning)