Susinnaanngitsumiit ilinniagaqartumut

- Tunngaviusunilli periuseqarpoq tamatta aallartiffissatsinnik, tamatumanilu kalaallit meeqqanik perorsaanermikkut ilinniagassaqarput. Killissat aalajangersimasut sukkutorsinnaanermullu killiliinerit aallartiffissaqqissuupput. Kalaallit Nunaanni meeqqat pingaaruteqarluinnarput.

Taamatut allappoq Aviaja Lyberth Haupmann, atuagassiap Ingeniørip nittartagaani, ing.dk-mi, isumaliutersuummini.

- Meeqqanut inuusuttunullu ilinniagaqarnikkut pitsaasumik tunuliaqartitsinissaq inuiaqatigiit suliassaasa pingaarnersaraat. Ukiulli ingerlaneranni Kalaallit Nunaat kalaallinik akisussaassusilinnik, piareersarluarsimasunik ilinniarluarsimasunillu pilersitsinissaminut pitsaanerpaanik atugassaqartitsisimanngilaq.

Taanna isumaqarpoq atuartitseriaaseq tamarmi pisoqalisoorsimasorujussuarmik tunngaveqartoq, tassa qallunaat atuartitseriaasaannut assingusorujussuarmik.

- Kalaallilli qallunaajunngillat, ajornartorsiortitsivorlu kalaallit meerartaat inuusuttortaallu qallunaat atuartitseriaasaannut naleqqussarneqassammata. Kalaallit Nunaanni Danmarkimilu kulturikkut assigiinngissuteqartorujussuuvoq, ilinnigaqarfinnilu tamanna ersarissumik malunnarpoq, Aviaja Lyberth Haupmann allappoq, aammalu tikillugu inuusuttut ilinniagaqartut piumaffigineqarnikippallaartut:

- Pissutsit ullumikkutut itsillugit Kalaallit Nunaanni ilinniarnertuunngorniarneq ukiunik pingasunik sivisussusilik Danmarkimi ukiuni marlunni HF-ip ukiunilu pingasuni ilinniarnertuunngorniarfiup akulerunnerattut naapertuuppoq. Tamanna inuusuttunut, Danmarkimi nunanilu allani ilinniaqqinniartunut, piareersaatitut pitsaavallaanngilaq, malunnaqalunilu inuusuttut unammilligassinneqarnissaat qunugineqartoq.

Allaaserisaa tamaat atuaruk ing.dk-mi

Qanoq isumaqarpit, Aviaja Lyberth Haupmann eqquiva? Ilinniagaqartitsinermi sanngiippallaaqaagut, taamaassimappallu qanoq iliortoqassava? Ataani oqallinnermi peqataagit.