Hashimik nakkutilliinngippallaarneq tupaatigaa
Danmarkimi parnaarussivinni hashitorneq inerteqqutaavoq, parnaavussinillini nakkutilliisut perulluliortoqarnissaa pinngitsoorniarlugu parnaarussat atuisinnaatittarpaat. Parneerussiveqarnermut siulittaasup tamanna tupassutigalugulu aalaterneqaatigaa
- Tupaqalungalu annilaarpunga.
Parnaarussivinni sulisut kattuffiata siulittaasua Kim Østerbye taama qisuariarpoq paasillugu parnaarussivinni nakkutilliisut parnaarussat hashitortarnerat isiginngitsuusaartaraat.
Parnaarussiviit kattuffianiipput Danmarkimi parnaarussivinni sulisut 3.600-t.
- Isumaqarpunga tamanna naliliinerlunnerusoq, tamassumalu takutippaa sumiiffiit ilaanni piumamik hashitortoqarsinnaasoq. Taamatut eqqarsartaaseq allanngortinngikkutsigu isumaqarpunga sulinissatsinni malitassavut unioqqutissimassallutigik, Kim Østerbye Ritzauimut oqarpoq.
Inuit sisamaangaangata pingasut maleruagassat malinneq ajorpaat
Aarhus Universitetimi ilisimatusarnerup nutaap takutippaa parnaarussivinni nakkutilliisut sisamaagaangata pingasuniit amerlanerit parnaarussivinni eqqissisimanissaq siunertaralugu maleruagassat malinneq ajoraat.
Nakkutilliisut hashitortoqarnissaa akuerisarpaat parnaarussat itillinganerulersarmata inuttullu ajornartorsiutitik matoorniarlugillusooq imminut nakorsaasernertut illutik, taamaalilluni perulluliortoqannginnerulluni, sulisut nammineerlutik oqaluttuarput. Taamatulli isiginnittaaseqarneq ajorluinnarpoq, nakkutilliisut kattuffiat isumaqarpoq.
- Eqqissisimaarniaannarluni imaluunniit naakkiginniinnarluni inatsisaatsuliornerit isiginngitsuusaarnissaat atorsinnaanngilaq. Kukkulluinnarneruvoq, parnaarussivinni sulisut kattuffiat oqaluttuarpoq.
Siunertaqarsinnaavoq
Pisulli ilaanni isiginngitsuusaartoqarsinnaavoq tamanna parnaarussat atornerluinerminnik unitsitsiniarnissaannik kajumissaarinermik siunertaqarpat.
- Takusinnaavara naliliissinnaaneq atorneqartoq pisunilu ikittuni isiginngitsuusaarluni, tamannali taamaallaat pisinnaasariaqarpoq aqaguani atornerluineq pillugu parnaarussanik oqaloqateqaraanni taamaalillunilu kajumissaarisoqarluni, nassuiaavoq.
Tallimanngorpat parnaarussivimmi nakkutilliisut hashimut isiginnittaasiat Pinerluttunik Isumaginnittullu ataatsimeeqatigiinnitsinni oqaluuserineqariissavarput. Iliuuseqartoqartariaqarpoq, siulittaasoq isumaqarpoq.
- Ullumi (tallimanngornermi, aaqq.) Pinerluttunik Isumaginnitunik ataatsimeeqateqarninni eqqartussavarput tamanna qanoq iliuuseqarfigissanerlutigu ministerit arlaannit appisaluunneqartinnata. Tamannami aaqqiinerunavianngilaq, Kim Østerbye oqarpoq.
Pisuni aalajangersimasuni naliliisinnaaneq atorsinnaasariaqarpoq maleruagassanut eqartunut taarsiullugu, atornerluinerullu unitsinnissaa taamaallaat siunertaappat parnaarussat innuttaasunut ilaalerseqqinniarneqartariaqarput, parnaarussivinni sulisut kattuffiata siulittaasuat oqarpoq.