Politiit tusaatissatut tiguaat

Kalaallit Nunaanni politiit imigassap sivisunerusumik ammasalernissaanik naalakkersuinermik suliallit aalajangiinerat tusaatissattut tiguaat. Politiilli siunnersuutip kingunerisinnaasai ernumassutigiuarsinnarpaat

Tallimanngornermi arfininngornermilu unnukkut qulingiluanut imigassap ammasalernissaa naalakkersuinermik suliakkit akuersissutigaat. Polfoto: Jens Grarup

Naalakkersuinermik suliallit ungasinngitsukkut politiit ernumassutaat tusaaniarnagit tallimanngornermi arfininngornermilu imigassamik tuniniaanerup sivitsornissaa akuersissutigaat, taamaalilluni siunissami unnukkut qulingiluat tungaanut imigassamik pisisoqarsinnaassalluni.

Tamannalu politiit tusaatissatut tiguaat:

- Naalakkersuinikkut akuerineqarmat tamanna aallaavigisariaqarparput. Sulili tusarniaanermi akissutiga isumagiuarsinnarpara, politimesteri Bjørn Bay Sermitsiaq.AG-mut oqarpoq.

Læs "Køb sprut indtil klokken 21"

Tusarniaanermi akissummini Bjørn Bayip ilaatigut mianersoqqussutigaa sivisunerusumik ammasalerneratigut meeqqani sumiginnaanermik ajornartoriutit annertusisinnaanerat sivisunerusumillu tuniniaasalernikkut imigassap atugaanerata annikilliartornera pitsaasoq unitsinneqarsinnaasoq.

Utaqqimaarniarput
Taamaattumik nunatsinni politiit utaqqimaarallarput – piffissallu ingerlanerani takuneqarsinnaalissaaq tallimanngornermi arfininngornernilu politiit amerlisariaqarnersut, soorlu ullumikkut taamaattoq assersuutigalugu akissarsiffiup nalaani.

- Ernumassutigaarput sivisunerusumik ammasalernerat kinguneqassasoq, utaqqimaarniarpugulli, Bjørn Bay oqarpoq.

Siunnersuummi nalinginnaasumik ammasarfiit sivitsorniarneqarput, inerneraali ammasarnerit tallimanngornermi arfininngornermilu sivitsorneqarnissaat.

Maani Sermitsiaq.AG-mi atuisut amerlanersaasa naalakkersuinermik suliallit ammasarfiit sivitsornerat pitsaasutut nalilerpaat - inernerat allaaserisap assitaanni takuuk.

Powered by Labrador CMS