Imigassat nalunaaqutaq 21 tungaanut ammasalerput
Inatsisartut akuersissutigaat tallimanngornikkut arfininngornikkullu nalunaaqutaq 21 tungaanut pisiniarfinni imigassarsiniartoqarsinnaassasoq
Immiaaqqanik imigassanillu kimittuunik pisinissaq ajornannginnerulerpoq, Inatsisartut pingasunngormat akuersissutigimmassuk tallimanngornikkut arfininngornikkullu pisiniarfinni nalunaaqutaq 21 tungaanut imigassarsiniartoqarsinnaassasoq.
Taamaasilluni sapaatip akunnerani ullut tamaaasa imigassaarniarnerup nalunaaqutaq 21 tungaanut tallineqarnissaanik inatsisissatut siunnersuutip siullermeerneqarnerani politikkikkut naapeqatigiilluni isumaqatigiittoqarpoq.
Atuaruk "Imigassaarniartarneq aalajangiiffigineqangajalerpoq"
Atuaruk "Imigassartornikilligaluttuinnarpugut"
Inatsisissatut siunnersuut upernaaq apriilimi ataatsimiinnermi Siumumeersumit Malik Berthelsenimit saqqummiunneqarpoq. Tamatuma kingorna siunnersuut sammisaqarfittut kattuffinni assigiinngitsuni tusarniaavigineqarpoq aammalu Inatsisartut Ilaqutariinnut Isumaginninnermullu Ataatsimiititaliaanni oqaluuserineqarluni.
Imigassaarniarnerup sivitsornissaanut tunngavilersuutigineqarpoq inuit pisiniarfinni tamatigoornerusumik sivisunerusumillu imigassarsiniarsinnaanissaat.
Imigassaarniarnerup sivitsornissaa sammisaqarfittut ataatsimiititalianut assigiinngitsunut tusarniaavigineqarpoq. Ilaatigut Kalaallit Nunaanni politimesterip Bjørn Bay-p ersissutigaa ammasarfiit sivitsorneqarpata meeqqanik sumiginnakkanik ajornartorsiut annertusissasoq - maannali tassa ammasaqarfiit sivitsorneqarput.
Inatsisartuni siunnersuummut akuersillutik 27-t taasipput, ataaseq akerliuvoq, marlullu taasinngillat.
Tallimanngornikkut arfininngornikkullu nalunaaqutaq 21 tungaanut pisiniarfinni imigassarsiniarsinnaalerneq qanoq isumaqarfigaajuk?