Timmissanik tuniniaaneq allanngunngilaq
Nuummi kalaaliaratoqqami timmissanik tulaassuineq unitsinneqarsimanngisaannarpoq
Soorlu allaaserereeripput marlunngornermi Nuutoqqami kalaaliaqqami eqqiluisaarnermut tunngasut aaqqissuunneqarneqarput. Tamatuma kingorna tamaani appanik erisarsinnaaneq inerteqqutaajunnaarpoq.
Namminersorlutik oqartussanit uumasunut nakorsaqarfimmit nuanniilliutigineqarpoq inuit ilaasa ima paasisimammassuk, Uumasunik nakorsaqarfiup erisarsinnaanermik unitsitsisut. Maanna paasinarsivoq ataasiarluniluunniit kalaaliaqqami erisarneq mattunneqarsimanngitsoq.
Nunatsinni nutaarsiassiiviit oqaluttuamik sammisaqarnerat Kommuneqarfik Sermersuumi sulisut akornanni paatsuuinermik aallaaveqartoq, tassa kommuni ullut arlallit matuma siorna allammat: Sapaatip akunnerata siuliani kalaaliaqqami timmissanik erisarneq uumasut nakorsaanit unitsinneqarpoq, neqini aalisakkanilu timmissat meqquinik nassaartoqarsimanera pissutigalugu.
- Ataatsimilluunniit timmissanik kalaaliaqqamut tunisineq matusimanngisaannarmat. Timmisanik erisarneq unitsinneqarpoq eqqiluisaarneq pitsaanngimmat. Tulaassuinermut tunngassuteqanngilaq. Unitsinneqartoq tassatuaavoq kalaaliaratoqqami eqqiluisaarnerup ajornera pissutigalugu timmissanik erisartoqaqqusaajunnaarpoq, kalaaliaqqami pisortaq Andreas Kleinschmidt, Sermitsiaq.AG.-mut oqarpoq.
Kommunimi kukkusimaneq ilumoornerarneqarpoq, inuup kukkuluttorneratigut eqqunngitsumik paasissutissiisoqarnera oqaatigineqarluni.
Kalaaliaqqami piffissami aalajangersimasumi timmissanik erisarnerup unitsinneqarnera oktobarimi aalisakkat nerpiini neqinilu timmissat meqquinik nassaartoqarsimaneranik aallaaveqarpoq.