Eqqumiitsuliortut sannavia ima ajortigaaq
Nuummi ukkusisserisartut sannaviat ajorluinnarpoq. Kiassarneqanngilaq, innaallagiaqanngilaq pujoralammilluunniit milluaasoqanngilaq
Nuummi ukkusissanik eqqumiitsuliortunut atugassarititaasut naammaginanngeqaat. Atugassarititaasut ima ajortigipput eqqumiitsuliortut isumaqarlutik, Kommuneqarfik Sermersuumit ilaginnarneqarlutik.
Sermitsiaq.AG'p illu nakkaatingajalersoq eqqumiitsuliortut qulleqaratik, kiassateqaratik pujoralammik milluaateqanngitsoq suliffigisaat.
Ulluinnarni eqqumiitsuliortut pingasut ukkusisserisarput tamaattut takornarianit nunaqavissunillu piumaneqartaqaat.
- Tarnikkut sakkortoorujussuuvoq taamannak atugassaqartitaalluni sulineq. Pingaartumik eqqarsaatigalugu kalaallit kulturiannik aallusseqataasuulluni, ukkusissiortartoq Thomas Jensen oqaluttuarpoq.
Ajunnginnerusunik atugassaqassapput
Taanna oqaluttuarpoq eqqumiitsuliortut sannavimmik pisariaqartitsisut, taamaattumullu Kommuneqarfik Sermersooq pilersitseqataasariaqartoq. Eqqumiitsuliortut namminneq sannaveqalernissaminnut akissaqanngillat. Nuummi sannavik siornatigut ukkusissalerisartunit ornikkumaneqartartoq siorna matuvoq.
Uagut nammineq sannavimmik pilersitsissagaluarutta immaqa ilutsinik imaattunik 10.000 sanaqqaartariaqassaanga, tamannalu ajornaatsuinnaanngilaq, Thomas Jensen oqaluttuarpoq qaannamillu eqqumiitsuliaq takutillugu.
Nuuk TV naapertorlugu Kommuneqarfik Sermersooq qaammatit pingasut ingerlaneranni ukkusissiortunut sannavimmik piareersimasuuteqalernissaat naatsorsuutigineqarpoq.