Sermersuaq ikaarlugu erniartortalissasut
Arnat Ittoqqortoormiuni najugallit naartusut siunissami 1500 kilometerinik ungasissusilimmut erniartortalissapput - Nuummi ernisassagamik
Namminersorlutik oqartussat aamma Air Greenlandip akornanni kiffartuussinissamik isumaqatigiissutip nassataanik Tunumut timmisartuussinerit aamma Tunup iluani timmisartornerit allannguuteqarnerinik nassataqassaaq. KNR naapertorlugu isumaqarpoq, Ittoqqortoormiormiut naartusut angerlarsimaffimmit ungaseqisumi erniartortariaqartalernerinik.
Naartusut Nuummut erniartortillugit timmisartuunneqartalissapput.
- Naak tusaqqaarlugu ingasaginaraluartoq siunissami Ittoqqortoormiunut tunngassuteqartut Nuummit kiffartuunneqarnissaat ajornannginnerulissapput kiffartuussinissamillu isumaqatigiissut nutaaq naapertorlugu Tasiilamit Ittoqqoortuuliarniaraanni Nuuk aqqusaaqqaarlugu aatsaat taamannak angalasoqarsinnaassasoq. Ittoqqortoormiuni innuttaasut ajoqqusernaveersaartittariaqarpagut taakkuami ataatsimilluunniit allannguutinut atuuttussanut akisussaatinneqarsinnaanngimmata, Dina Berthelsen Kommuneqarfik Sermersuumi peqqissutsimut tunngasumik suliaqartoq knr.gl-imut oqarpoq.
Nuannerpallaanngilaq
- Tunumiut ernisoqqajaasunut tamanna nuannerunanngikkaluaqaaq. Taakkunnguakkuluimmi sermersuaq ikaarlugu kilometerinik tusintilikkaanik timmisartoqqaarlutik erniartortariaqartalissapput, ernilerpatalu ilaqutaasut akuusinnaajunnaassallutik. Ajornartorsiut taanna siunertaasimagunanngikkaluarpoq, allatulli ajornartumik ernisuttussat peqqinnissaqarfimmiullu ukiortaamiit ajornartorsiutaalersussaq atugarisariaqassavaat, Dina Berthelsen taama isummersorpoq, Dina Berthelsen knr.gl. nangilluni oqaluttuarpoq.
Taassumalli arnat Ittoqqortoormiuneersut eqqissisimaqquai:
- Tasiilami suleqativut siornatigut qanoq iliuuseqartarsimanersut maanna misissuleruttorparput. Ilami ernisukkiartortut qanoq amerleriartigissanersut suliluunniit ilisimanngilarput. Illoqqortoormiormiulli ernumanissaminnut pissutissaqanngillat. Tassami naalugiarsuttaasa kiffartuunneqarneri ajorseriassanngimmata. Aamma piffissap ilaani Illoqqortoormiormiut peqqissaasunit tikeraarneqartassapput, atorfissaqartinneqartillutalu tamatigut takkuttuaannarniarluta, Dina Berthelsen knr.gl.-imut taama neriorsuivoq.