Serminit iggartunit sikut aquttunik eqeersimaartitsipput

Siku igaartartuneersoq 2011 aamma 2012, Kitaani pisarnerminit annertuneruvoq, tamatuma nassataanik pilersuinermi ilungersunartorsiortoqarluni. Taamaattumik kujataani Nanortalimmut avannaani Ilulissanut nassiussat akuttunngitsumik kinguaattoortarput, allaat sapaatip-akunneranik sivisussusilinnik pisarlutik. Sikunik alapernaarsuisut umiarsuarnut kiffartuussinerat DMI’p illoqarfinnut silassamik nittartakkakkut saqqumersitaanik taperlugit, angallanneq illersorsinnaassusilimmik aamma tutsuiginartumik ingerlanneqarpoq.

Taamak oqaluttuarpoq Gert Bjerre, Royal Arctic Linep containerinik angallataani aquttoq, umiarsuarmi tassani DMI’p - Danmarks Meteorologiske Institut – angalaqataaffigisimasaani:

2 knobinit 5 knob tikillugu taamaallaat sukkassuseqarluta ingerlavugut, Ilulissat Kangerluani, ilulissat sikut sikualuillu akornisigoorluta.

- Sangujoraartariaqartarpugut, Gert Bjerre oqarpoq. Irena Arctica aquppaa tassaasoq sineriammi pilersuinermik ingerlatsisoq, umiarsuaq containerinik angallassissut Kalaallit Nunaata kitaata sineriaani Nanortallip Ilulissallu akornanni. Gert Bjerre imartami sikulimmi angalanermik sungiusimasaqarpoq umiarsuarlu sikunut illersuutitaqartoq marloqiusamik timitaqarpoq, skruitai illugiit 8000 hestekræftinik sakkortussuseqarlutik. Qulliit sikusiornermi atortut unnukkut ikumasarput joystick/aquut atorlugu umiarsuup eqqaani sikunik qinaasissutaallutik.

Irena Arctica Kalaallit Nunaata kitaata sineriaani ilulissat, sikut, sikumerngit, sikuartat, sikuarnerit nilaallu akornanni angalatillugu angallammik ingerlatsisup, aquttup pigaartup aamma umiarsuarmi ikiortip tamakku nakkutigilluagassaraat. Ukiut qaangiuttut marluk upernaakkut aasakkullu angalanermi Ilulissat Kangerlussuani siku, sermip iigarnerinit aallaaveqartut annertusiartuinnartumik takussaapput, siornatigut takusarsimasanit annertuneroqaluni.

Naatitat nutaat amigaataapput
Siku sermimit iigartoq nunami apummit imermillu pilersitaavoq. Taamaattoq immap sikuanit manngerneruvoq, tungujornini ilisarnaatigalugu.

- Siku sermimit iigartumeersoq aserorteruminaanneruvoq umiarsuilluunniit sikunut akiuussutitaqaraluarpata, Gert Bjerre oqarpoq.

- Maskiinamik taamak angitigisumik aqutsillaqqissuusariaqarpoq. Sangujoraarluni sanioqquasinnaanngikkaanni kigaatsunnguamik ajatsiniaasoqarsinnaavoq.

Anorlilersillugu sikulu aalalersillugu illoqarfiit umiarsualiveqarfii tikinneq ajornarsivissinnaasarput.

- Apriilimi Ilulissanut tulassinnaannginnatta sapaatip akunneranik containerinik nassatarisatsinni usingiarnissarput kinguaattoorluni, Gert Bjerre oqaluttuarpoq.

- Pisinniarfinni niuertut eqqorneqartarput. Tamakkua naatitat sapaatip akunneranik pisoqaassusillit naammagiinnartariaqarpaat.

Siku silalu alapernaappaat
Sikusimanerata annertussusaa taassumalu pissusaa inuit naalagaaffigisinnaanngilaat, taamaakkaluartoq cointainerinik ukioq naallugu angallassinneq taakkunanit ingerlanneqarsinnaavoq.

- DMI’p sikunik alapernaarsuisu piginngikkaluarutsigit ullumikkutut kiffartuussineq ingerlassanngikkaluarpoq, Gert Bjerre oqarpoq.

Sikunik alapernaarsuisut angallatit, pingaartumik Kujataani angalasut ingerlaavartumik paasissutissittarpai. Sikut assingi assillu satellitsineersut atorlugit.

- Assit sikunik alapernaarsuisuneersut uagutsinnut iluaqqutaasorujussuupput Kujataani angalagaangatta. Sikullu pillugit paasissutissat tapertaalluarput. Sikunik alapernaarsuisut akuttunngitsumik telefonikkut oqaluuttarpagut, alapernaarsuileraangata alapernaarsuereerangatalu, apeqqutit aalajangersimasut akissutissarserusullugit.