Sisimiuni palaseqaratik juullisiussapput

Sisimiuni palaseqarfik decembarip aallaqqaataani palaseerutissaaq maanna ilagiit sinniisaat biskoppimut saaffiginnipput ajornartorsiut anigorniarlugu qanoq iliuuseqaqqullugu

Sisimiuni palaseqarfik decembarip aallaqqaataani palaseerutissapput maanna ilagiit sinniisaat biskoppimut ajornartorsiutip qanoq iliuuseqarfiginissaa saaffiginnissutigineqarpoq. Assi: Søren Duran Duus

Sisimiut nuannerpallaanngitsumik inissisimalerpoq illoqarfiup palasia aamma ajoqi atorfimminnit tunuarsimammata.

Sisimiuni Ilagiit sinniissaat pingasunngornermi ataatsimiipput pissutigalugu palasi Oline Berthelsen decembarip aallaqqaataani atorfimminit tunuarmat.

- Oline Berthelsenip nalunaarfigaatigut piffissamik aalajangigaanngitsumik atorfimmini tunuarniarluni, Sisimiuni ilagiit sinniissaat ilisimatitsipput.

Oline Berthelsenip tunuarniuteqarnerminut ilaatigut tunngavilersuutigaa, Sisimiuni innuttaasunut 6000 missaanniittunut illoqarfiullu nunaqarfiinut kisiartaalluni palasiulluni. Juunimili sumiiffimmi kisiartaalluni palasitut sulilluni.

- Maanna misigisimavoq nukissaarulluni, Ilagiit sinniissaat

Ajoqi aamma atorfimminit tunuarpoq

Oline Berthelsenip Ilagiit sinniisaat ilisimatippai ajoqip ilinniarsimasup atorfimminit aamma tunuarniuteqartoq, tikkuarlugulu ajoqi qaammammut taamaallaat nal. ak. 20-t aningaasarsiaqartinneqartoq.

Taamaattumik Sisimiuni Ilagiit sinniisaasa biskop Sofie Petersen aamma Ilaqutariinnermut, kultureqarneramut, Ilagiinnut aamma naligiissitaanermut naalakkersuisoq Mini Karlsen, Inuit Ataqatigiit kaammattorpai ajornartorsiutip qaangerneqarnissaanut sukkanerpaamik qanoq iliuuseqaqqullugit.

- Nalliuttorsuarni aggersuni uagutsinnut atugassarititaasut akuerisinnaanngilluinnarpagut, Ilagiit sinniisaasa biskoppimut politikkikkullu akisussaasumut ammasumik allagaanni takuneqarsinnaavoq.

Ilagiit sinniisaat Sisimiuni nunaqarfittaanilu atsiornernik katersititsipput.

Powered by Labrador CMS