Ove Karl – maanna kinamiut tv-anni
Nunatta Kinamut tuniniaaniarluni annertuumik nittarsaanera aamma China Dailys-ip soqutigilerpaa. TV-kut ilanngussaq takuuk
Nunatsinni Danmarkimilu tusagassiorfiit kisimik ingerlatsiviit nunatsinneersut arlallit, inuussutissarsiornermut aatsitassanullu Naalakkersuisoq Ove Karl Berthelsen, Inuit Ataqatigiit, siuttoralugu, Kinami tuniniaavissarsiorlutik annertuumik nittarsaanerat malinnaaffiginngilaat.
Aamma Kinami tusagassiorfiit isumaqarput nittarsaaneq soqutiginartuusoq, ilaatigut China Daily.
Sermitsiaq.AG-p China Daily-p aaqqissuisua Yeu Fenghua suleqatigalugu paasiniarpaa Kalaallit Nunaat pillugu tv-kut ilanngussami sorpiaat pineqarnersut.
Aaqqissuisoq nassuiaavoq:
- ilanngutassiami pingaartumik Kalaallit Nunaat nalinginnaasumik paasissutissiissutigineqarpoq Vist Greenlandimit ilikkarsimasatsinnik, ilaatigut inooriaasissinnik soqutiginartunik takutitsisoqarlunilu oqaluttuartoqarpoq.
- Videoliaq quppernermi nittartakkatsinni pitsaasumut inissipparput, eqqoriarparalu video soqutigineqarluassasoq, Yue Fenghua oqarpoq.
China Daily-p tv-kut ilanngutassiaa 2:35 minutsinik sivisussusilik uani takuuk
Nunatta Kinami tuniniaavissarsiorluni nittarsaanera pillugu annertunerusumik atuarit ukunani "Ove Karl: Kina periarfissat nunagaat" aamma "Great Greenland nutaamik tuniniaavissarsiorpoq"