Umiarsualiviup allilerneqarnissaa nukinginnarpoq

Umiarsualivimmik alliliinissamut aalajangiiniarnerit tuaviuunneqarnissaat Nuup borgmesteriata Royal Arctic Linellu kissaatigaat

- Umiarsualivik atorfissaqartipparput. Ukiut tulliuttut tallimat iluanni tamatumunnga pinngitsaalisaanngilagut. Kisianni erniinnaq susoqanngippat imaassinnaavoq assartukkatsinnut akunnittussanut umiarsualivinnik allanik atuisariaqalersinnaasugut, Royal Arctic Linemi paasissutissiisartoq Jakob Strøm oqarpoq.

Nuummi umiarsualivimmik alliliinissamik Namminersorlutik Oqartussat suli akuersissutiginnissimannginnerannik Kommuneqarfik Sermersuumi kommunalbestyrelsip sakkortuumik isornartorsiuineranut atatillugu taama oqartarpoq.

Nuuk avaqqutiinnarlugu

- Namminersorlutik Oqartussat pitsaasumik suleqatigigaluarpavut, kisianni aamma umiarsualivimmi inissamik annertunermik amigaateqarpugut. Nuummi containerinut umiarsualivik siunissami assartukkanut tigusaligassatsinnut sanilliullugu mikivallaalissaaq. Tamanna aamma Sullualukkut siunissami umiarsuaqartalersinnaaneranut atatillugu isiginiarneqassaaq, Jakob Strøm oqarpoq.

Assartukkanummi akunnittussanut inissaqartitsinnginneq pissutigalugu assartukkat Nuuk avaqqutiinnarlugu ingerlanneqartalersinnaanerat Kommuneqarfik Sermersuutullu aarlerinartutut isumaqarfigaa.

- Nuummi umiarsualivik allilerneqanngippat Reykjavikimi assartukkanut akunnittarfimmik umiarsualiveqarsinnaanerput, tassanngaanniillu umiarsuarnut minnerumaanut usilersuuteriarlugit ornigassanut assartuussisarsinnaaneq uatsinnut atatillugu takorloorsinnaavara. Assersuutigalugu Rotterdamimi (Hollandimi, aaqq.) taama pisoqartarpoq, taannami assartukkanut Europamut tamarmut nassiunneqartartunut inissiigallartarfittut umiarsualiviuvoq.

Millionerpassuit

Takorluugaq tamanna Jakob Strømip Nuummut nuukkusuppaa Qeqertani umiarsualivimmut nutaamut.

Kommuneqarfik Sermersooq aamma taama nalunaarpoq, siunissami isertitassat sumiiffinnut allanut inissinneqarsinnaanerat ernummatigalugu.

- Nuummi umiarsualivimmik allileriniarnerup Namminersorlutik Oqartussanit suli akuersissutigineqannginnera akuersaarneqarsinnaanngilaq. Tamanna kingunipiloqassaaq, borgmester Asii Chemnitz Narup oqarpoq, kommunalbestyrelsilu peqatigalugu Namminersorlutik Oqartussat kaammattorlugit ilimasaarisimaneq naammasseqqullugu, Nuummi umiarsualiviliorneq piaarnerpaamik aallartissinnaaqqullugu.

Nuummi akunniffiusartumik umiarsualiveqannginnera inuiaqatigiinnut ukiut tamaasa millioninik marlunnik kisitsisitalinnik akeqartartoq Assartuussinermut Ataatsimiititaliarsuup missingerpaa.