Nunatsinni aliikkutassiaralugu filmiliaq nutaaq ikiortissarsiorpoq
’Nivi'-mik filmiliortut taperneqarnissamik kikkunnut tamanut ikiortissarsiorput, filmiliornermi missingersuutit matussutissaat killeqaqimmata
Aliikkutassiaralugu nunatsinni filmiliamik 'Nivi' pilersitsiniarnermut atatillugu filmiliortut kikkunnilluunniit taperneqarusupput - Kalaallit Nunaanni pisumik aamma nunatsinneersumik filmimik takorusuttunit.
Taama filmimik pilersitsiniarnermik ingerlatsisoq Kristian Nygård oqarpoq.
Crowd funding aqqutiaglugu neriuppoq filmiliornermut tapiissutinik pissarsisinnaassalluni.
'Nivi'-mik suliniummi Kristian Nygård ingerlatsisuuvoq, taassuma nunatsinni filmiliaq alla 'Aqqalu' siornatigut saqqummersereernikuuaa pilersitsisartoq Steen Herdel, filminik ’Du er ikke alene’ aamma ’I Kina spiser de hunde’ saqqummersitsisuusimasoq.
Kalaallit Nunaanni aliikkutassianik filmiliorneq nunarsuarmi suliassat oqinnersarinngilaat. Kulturi aamma oqaatsit amerlanernit ilisimaneqanngillat taamaattumik suliniutitsinnut aningaasaleerusuttunik nassaarniarneq ajornakusoorpoq. Tamatuma saniatigut filmiliorneq akisoorujussuuvoq, Kristian Nygård nassuiaavoq, tamannalu tunuliaqutaralugu inunnik ikiuukkusuttunik ujaasinini erseqqissaatigalugu.
Ikiaroornartoq aamma politiit peqquserluttut
Kristian Nygård 'Nivi'-p imassaa nassuiaatigaa:
- Nivi 25-nik ukioqarpoq Nuummi ikiaroornartunik tuniniaanini ingerlanniarsaralugu arnamik asasaminut aappaqarniarnermi saniatigut, tamanna ilutigitillugu qanga pisimasut aliortuatitsippullusooq. Kisermaassilluni ingerlatsinera unammillertimit nutaamit nukittuumillu ilungersunartorsiortitsipput, taamaattumik sakkortusaartariaqarpoq. Kalaallit Nunaanni ikiaroornartumik tuniniaanermi pissaaneqarniuunneq aallartippoq politiit peqquserluttut, politikerit kikkullu tamarmik Nivimik annersitsisimasut taputartuunneqarnissaat pinngitsoorneqarsinnaanngilaq.
Kristian Nygård naapertorlugu 'Nivi' filmiliaavoq sakkortooq Kalaallit Nunaanni pissutsinut maanna atuuttunut, pinerlunnernut aamma qanga pineqarsimanermut tunngasoq.
Nygård 'Aqqalu'-mmik filmiliaa aningaasat amerlanngitsut atorlugit suliaasoq Katuami novembar 2011 takutinneqarpoq.
Peqqaataanik 'Nivi'-mut 20.000 koruunit pissarsiariniarneqarput.
- Aningaasat ilaatigut filmimik immiussinissamut atorneqassapput. Sinneruttut aningaasaliisussarsiornernit aamma aningaasaateqarfinnit nassaariniarneqarput, Kristian Nygård oqaluttuarpoq.
’Nivi'-mik suliniut annermik uani paasisaqarfigisinnaavat aamma aningaasatigut taperserlugu, taamattaaq apeqquteqarnissamut oqaaseqaateqarnissamullu periarfissaqarpoq.
Filmimip takutitassiaq siulleq uani isiginnaarsinnaavat