Savaateqarfiit pitsaanerusunik atugassaqalissapput
Isumaqatigiissutip nutaap kingunerisaanik Kommune Kujalleq aningaasanik tunineqassaaq savaateqarfinnut savaateqarfiillu akornanni aqqusinikkut attaveqarnerup pitsanngorsarnissaanut
Savaateqarfinni pissutsit maanna pitsanngorsarneqartussanngorput.
Tamanna pivoq namminersorlutik oqartussat, kommuneqarfiit kattuffiata Kanukoka-p aamma Kommune Kujalliup isumaqatigiissummik atsioqatigiinnerisa kingorna, tamatumalu kinguneranik kommuni aningaasanik tunineqarpoq, savaateqarfinnut savaateqarfiillu akornanni aqquserngit pitsanngorsarnissaannut.
Aningaasat 400.000 koruunit namminersorlutik oqartussat kommunillu akornanni suliassanik tunniussinissamik isumaqatigiissutip ilagai. Isumaqatigiissutip atuutilinnginnerani savaateqarfinnut savaateqarfiillu akornanni aqquserngit pitsanngorsarnissaannut aningaasat atorneqartussat Kommune Kujallermi namminersorlutillu oqartussani oqaluuserineqarsimapput.
- Isumaqatigiissuteqarnikkut marloqiusamik allaffissortoqarunnaassaaq. Taamaasilluni suliassamik tunniussinikkut suliat suliarineqarnerat sukkanerusumik pitsaanerusumillu ingerlanneqartalissapput, taamaasillunilu innuttaasut pitsaanerusumik sullinneqalissallutik, aalisarnermut, piniarnermut nunalerinermullu Naalakkersuisoq Ane Hansen, Inuit Ataqatigiit, oqarpoq.
Kujataani savaatillit aasaanerani sammisat maanna unipput. Sapaatip akunnerani kingullermi marlunngormat Narsami toqoraavimmi Neqi-mi ukioq manna toqoraaneq kingulleq pivoq, tamatumani savaaqqat 21.967-it, savat 1611-t nersussuillu 19-it toqorarneqarlutik. Linkimi uani savaatilittut inuuneq takusinnaavat, sæsoni naagaangat aasarlu ukianngorlunilu ukiunngoraangat.