Aviisi akeqanngitsoq avannaani saqqummerpoq

Tamanut Avannaani tassaavoq aviisip nutaap aqqa taanna Qaasuitsup Kommuniani pingasunngornermi saqqummerpoq

Tamanut Avannaani aviisip nutaap aqqa pingasunngornermi Qaasuitsup Kommuniani perngaamik saqqummerpoq.

Aviisi akeqanngitsoq Tamanut Avannaani pingasunngornermi siullermeerluni Qaasuitsup Kommuniani saqqummerpoq.

Aviisimut nutaamut tunuliaqutaavoq Ilulissat, Aasiaat, Kangaatsiaq, Qasigiannguit, Qeqertarsuaq, Uummannaq, Upernavik aamma Qaanaaq ataatsimut katersuuffeqartilernissaat isummersuutinik, allaaserisanik, aliikkutassanik aamma ussassaarutinik imalik aallaavigalugu. Piffissap ingerlanerani aviisi kommunimi sumiffinni tamaginni pissarsiarineqarsinnaanngornissaa aallaavigineqarpoq.

Aviisimik nutaamik aallartitsinermi Tusagassiivik Sermitsiaq.AG tunuliaqutaavoq. Tusagassiiviup Nuuk Ugeavis qangali iluatsitsilluartumik ingerlataraa. Iluatsitsilluarnermut tunuliaqutaavoq Nuummi pisut tamangajaaviisa aviisimi takoqqusaarutitut imaluunniit allaaserisatigut ilanngunneqartarnerat.

- Uagut nammineq naammagisimaartorujussuuarput Tamanut Avannaani saqqummerseqqaarnera, soorunami kukkuneqalaaraluarluta aamma siammarterinissaq unammillernartoqaraluartoq, aaqqissuisuuneq Poul Krarup oqarpoq.

Aviisi akeqanngitsoq pisinniarfinni aamma inuit ornittagaanni aaneqarsinnaavoq
- Assersuutigalugu ajuusaarutigaara allaaserisat ilaat qallunaatut marloriarluni ilannguttoorneqarmat. Illuatungaani nuannaarutigaara ingerlatsivinnit avannaanilu kommunimit tapersersorluarneqarnerput. Ataatsimut suleqatigiinnitsigut sumiiffimmi tamarmi iluaqqutaasussamik tusagassiiveqassaagut, Poul Krarup oqarpoq, taassuma aamma nuannaarutigaa aviisi akeqanngitsoq Ilulissani suliffeqarfimmik pilersitsimmat.

- Sumiiffimmi nutaanik pilersitseqataasinnaanerput nuannaarutigaarput neriuppugullu piffissap ingerlanerani sumiiffimmi amerlanernik sulisoqalersinnaassalluta. Tamanna nuna tamakkerlugu tusagassiivinnut aamma iluaqqutaassaaq, aaqqissuisuuneq naliliivoq.

Aviisi siulleq maanna piareerpoq. Qaasuitsup Kommuniani pisinniarfinni inuillu katersuuffiini akeqanngitsumik pissarsiarineqarsinnaavoq, aamma nittartakkakkut ugguuna aaneqarsinnaavoq.

Powered by Labrador CMS