Cyberikkut qinngasaartittarpit?

Inuusuttut akornanni mobilitigut internettikkullu qinngasaarineq atugaasorujussuaq AG-p sammivaa. Ajortisaariaaseq arlallit toqunerannik kinguneqarsimasoq

Sisimiuni Nalunnguarfiup Atuarfiani pingaartumik nivissat 13-15-inut ukiullit cyberikkut imminnut qinngasaartarput. Assi pisuusaartitaq: Leiff Josefsen

Cyberikkut qinngasaartittarpit imaluunniit nammineq qinngasaarisarpit, taava AG-p attaveqarfigerusuppaatit.

Facebook-ikkut, mobilikkut elektroniskimillu attaveqarfitsigut allatigut qinngasaarisarneq ajornartorsiut erloqinartuuvoq annertusigaluttuinnarlunilu. Malersuineq malersorneqartumut iliuuseqarfigissallugu ajornakusoorsinnaasoq. Pissutigalugu inuit taamaasiortut kinaassutsitik isertuuttarmatigit, aammalu pissutigalugu soorunami qinngasaarneqartumut tarnikkut artornarsinnaammat ataatsimuussutsimut peqataannginnermik ataatsimullu atugarisat avataaniinnermik misigissutsip akiorniarnera.

Cyberikkut qinngasaarisarneq pingaartumik nivissat akornanni atugaaqaaq, nunanilu allanik imminut toqunnermik kinguneqartarsimalluni.

Sapaatip akunnerani uani piffissami aggersumi AG-p ajornartorsiut tamanna sammivaa, qinngasaarneqartartunillu aammalu qinngasaarisartunik attaveqarusulluni. Aviisp inuit kinaassutsiminnik isertuussinngitsut attaveqarfigerusunneruvai. Aammattaarli kinaassutsimik isertuussisoqarsinnaavoq. AG uunga attaveqarfigisinnaavat redaktion@ag.gl.

AG-mi saqqummersumi allaaserisaqarpoq "Cyberikkut qinngasaarisarneq ajornartorsiut annertusigaluttuinnartoq", tassani Sisimiuni Nalunnguarfiup Atuarfiani atuarfiup pisortaata Jonathan Petersenip cyberimi qinngasaarinermik ajornartorsiutit oqaluttuaralugit. Aviisi pisiariuk uani:

Powered by Labrador CMS