Suliffeqarfik isumannaallisaanermi peqqissaarussinngilaq

Sullivinnik Nakkutilliisoqarfimmit aalajangiunneqarpoq isaterinernik ingerlatsisut Kingo Larsen isumannaallisaanermik naammaginartumik ingerlatsisimanngitsut Blok P’p nunngutaavanik isaterinermik ingerlatsinerminni.

Nalunaarusiami allassimavoq suliap isumannaatsumik ingerlanneqarnissaa pillugu pilersaarusiortoqarsimanngitsoq, aamma Sullivinnik Nakkutilliisoqarfik isumaqarpoq maskiina kukkusoq sulinermi atorneqarsimasoq.

Assaassuarmik atuinani isaterinermi kivitsissut ingerlaarsinnaasoq atorneqartussaagaluartoq Nuuk TV ilisimatitsivoq.

Oktobarip 19-ianni Blok P’p nunngutaavata peerniarnerani ajorluinnartumik pisoqarpoq. Illorsuup iigarsua assaassuaq qallerlugu uppippoq angut maskiinamik aqutsisoq qallerlugu, taanna tupinnaannartumik ajunaarnermit anneraluarluni aniguivoq.

Sullivinnik Nakkutilliisoqarfiup ulloq taanna sulineq unitsippaa ajutoorneq isaterinermillu suleriaatsip nalilersorneqarnerisa nalaanni. Permagreen Greenland blok P’mik isaterinermi Kingo Karlsen suleqatigaat.

Sullivinnik Nakkutilliisoqarfiup politiit nalunaarusiaat maanna utaqqimaarpaat isaterinermik ingerlatsisut politiinut unnerluutigineqassanersoq naliliffiginnginnerani.