Inuk—mut billitsit tamarmik nungupput
Nunatsinni filmiliaq manna tikillugu nunarsuarmi sumiiffinni tamaginni nuannarineqaqisoq immikkut ittumik Københavnimi takutinneqassaaq
Nunatsinni filmiliaq Inuk ukiut kingulliit filmfestivalini nunani tamalaani 20-t sinnerlugit ingerlanneqartuni nuannarineqaqaaq, taamatuttaaq Nunatsinni illoqarfinni arlalinni takutinneqarami assorsuaq nuannarineqarpoq.
Sapaatip akunnerata tulliani ataasinngornermi filmi Danmarkimi takutinneqassaaq. Tamanna pissaaq Københavnimi Grand Teaterimi immikkut ittumik takutitsinermi. Tassungalu tunngatillugu soqutiginninneq annertoqaaq. Billitsit 300-nik amerlanerulaartut takutitsisoqarnissa sioqqullugu ullut 14-it ingerlaneranni tamarmik nungupput.
Filmi nunatsinni Oscar Komitiimit nunarsuarmi filminik nersornaasiinernut pingaaruteqarnerpaamut ilaatinneqarnissaa innersuussutigineqarpoq: Oscarimik nersornaasiineq ukiut tamaasa Hollywoodimi ingerlanneqartartoq tusagassiivinnit malinnaaffigineqarluartarpoq. Filmi nunani allani filmlianit nersornaasiinissamut innersuunneqassanersoq qaammatit aggersut ingerlaneranni aalajangiunneqassaaq.