Niaqornat pillugit filmi CPH:DOX takutinneqassaaq
'Village at the End of the World' Københavnimi filmfestivalip ingerlanneqarnerani marloriarluni takutinneqassaaq
Aqagu arfininngornermi aamma arfininngorpat tulliani novembarip qulinganni tuluit piviusulersaarusiaat 'Village at the End of the World' Nunatsinni nunaqarfik Niaqornat pillugit filmiliaq CPH:DOX-imi takutinneqassaaq.
Filmimik takutitsineq siulleq filmertarfimmi Dagmarimi nal. 16.40 pissaaq aappassaanik takutinneqassalluni Paladsimi nalunaaqqutaq 16.30.
Piviusulersaarummik filmiliami ukiup aappaata avillugu nunaqarfimmi inuunermik malinnaanermi takutinneqarpoq Niaqornani aalisakkanik tunisassiorfiup ammaqqinniarneqarneranut atatillugu innuttaasut imminnut qanilliartornerat. Aalisakkanik tunisassiorfik nunaqarfiup uummatigisimasaannik ammaaqqinniarnermi Karl Kristian siuttuuvoq nunaqarfimmi innuttaasut sinnerlugit qasusuilluni suliniuteqartoq. Filmi pitsaasumik isiginnittaaseqarluni suliaavoq takutinniarneqarluni nunaqarfimmi piniartutut inuusut inuunermut nutaaliaasumut unammilligassaqarnerat.
Nunarsuarmi sumiiffiit pinnernersaasa ilaat
Ukiut marluk ingerlaneranni filmi suliarineqarpoq filmiliornermi ilitsersuisumit Sarah Gavron aamma filmiliornermi assiliisumit David Katznelson. Taakkua Niaqornanik nuannarisaqarluinnarput, taallugulu nunaqarfik nunarsuarmi sumiiffiit pinnernersaasa ilaanniittutut. Filmimi torrallataalluinnartumik imaq aamma siku assilineqarsimapput filmimi sammineqartumik tupinnaannartumik kusanartumik tunuliaqutaallutik.
Nunarsuarmiut allat filmimik 'Village at the End of the World' isiginnaartussat nunaqarfimmi mikisumi iluatsitsineq malinnaaffigissavaat.
Piviusulersaarut qaammatip ataatsip matuma siorna London Film Festivalimi BFI-mi takutinneqarpoq.
'Village at the End of the World' på CPH:DOX uani ilaannakorlugu takusinnaavat