Raajarniarneq pillugu angusaqartoqarpoq
Nunatsinni raajarniarnermi MSC-mik nalunaaqutsiisarneq piviusunnguleraluttuarpoq. Aalisarnermi piumasaqaatit tamarmik naammassineqarput
Nunatsinni raajarniarnermi MSC-mik nalunaaqutsiisarneq qularnanngitsumik ukiumi nutaami atuutilissaaq, tamatuma nassataanik raajanik qalerualinnik, qalatanik aamma qalipaajakkanik tuniniaanermi piujuartitsineq aallaavigalugu aalisarnerup ingerlanneqarnera MSCp ilisarnaataa tungujortoq atorlugu aallartinneqassalluni, Sustainable Fisheries Greenland ilisimatitsivoq.
Raajarniarneq aalajangersaariaatsit pingasut atorlugit nalilersorneqartarpoq, 60 point tassaalluni akuerineqarsinnaasut appasinnerpaaffiat, annerpaamik 100 pointinik pissarsisoqarsinnaavoq. Kalaallit Nunaanni raajarniarnermi nalilersueriaatsit pingasut atorlugit naliliinerni 82 aamma 90 pointit akornanni ingerlatsisoqarpoq.
Peqassutsip nalilerneqarnerani 90 point tunniunneqarput, ingerlatsinerup pitsaassusaa 84,3 point aalisarnerup pinngortitamut sunniutaa 82 pointinnalluni.
Nalilersuinermi sinerissap qanittuani aamma imartami aalisarneq pineqarput naliliinerlu ukiuni tallimani atuuppoq misissuineq ukiut tamaasa ingerlanneqartarluni.
Kalallit Nunaanni raajarniarnermi MSC-mik nalunaaqqutsiisarnerup atuutilerneqarnissaa 2008 aallarnerfigalugu ingerlanneqarnerani 5 millioner koruunit missaat aningaasartuutaapput.
Qaammatini tulliuttuni nunatsinni raajarniarneq pillugu nalilersuinermut tamat oqaaseqarsinnaatitaanerat periarfissinneqarpoq.