Nannunik isiginnaarneq naammanngilaq
Inatsisartut siulittaasuat Josef Motzfeldt, Nunat Avannarliit Killiit pillugit ataatsimeersuarnissamik siunnersuuteqarpoq
Nunat Avannarliit Killiit Nunat Avannarliit siunnersuisooqatigiviini isiginiarnerusariaqarput. Inatsisartut siulittaasuat Josef Motzfeldt taamak oqariartuuteqarpoq ukioq manna Nunat Avannarliit Siunnersioqatigiivi Helsinkimi ataatsimeersuarneranut atatillugu. Taanna Nunat Avannarliit Killiit siulittaasuatut aamma issiavoq.
- Nunat Avannarliit Killiit isumalluutinik aqutsinerat isiginiarnerusariaqarpoq, tamakkua Nunat Avannarliit nunavittaat peqatigalugit isumalluutigisagut nunani avannarlerni killerni pingaarnertut inuussutissarsiutaasut, Josef Motzfeldt oqarpoq Atlantikup avannaani aalisarneq innersuutigalugu.
Taamaattumik Nunat Avannarliit Killiit siunnersuisooqatigiviini Josef Motzfeldt siunnersuuteqarpoq, Nunat Avannarliit Siunnersioqatigiivi Nunat Avannarliiit pillugit ataatsimeersuarnermik ingerlatsissasoq aamma nunat avannarliit killiit ineriartornermut peqataasariaqartut, issittumi politikki aamma silap pissusaata allanngoriartornera, nammineq oqaatigisaatut, kaammattuutigaluguttaaq ' Pisuussutit uumasusillit piujuartitsinermik aallaaveqarluni ataatsimoorussamik aqunneqarnissaannut isummerneq'.
Uumasut allat nannuniit pingaarnerupput
- Silap pissusaata allanngoriartorneranit nunani avannarlerni killerni uumasut naasullu sunnerneqarput. Akuttunngitsumik nannut isiginiarneqartarput silap pissusaata allanngoriartornera eqqartorneqaleraangat, kisianni nunani avannarlerni pinngortitap sunnerneqarnissaa annerujussuuvoq nannut allanngornermit misigisassaannit, Josef Motzfeldt oqarpoq Nunat Avannarliit Siunnersuisooqatigiivisa ataatsimiinneranni tikkuaasoq, nunat avannarliit killiit uumasoqatigiit ilaasa allannguuteqarnerannit annertuumik misillertut nunani aalajangersimasuni annertuumik sunniutilinnut.
- Inuit kateriffiini, ataatsimeersuarnerni saqqummersitsinernilu nunarsuarmi sumiluunniit ingerlanneqartuni silallu pissusaa oqaluuserineqartillugu ilaanni eqqarsalersarpunga, Issittumi nanoq kisimi uumasuusoq kunngeqarfimmini kiserliorluni uumalluni.
- Nanoq sumiiffimmini ulorianartorsiortitaavoq aap, kisianni uumasut allat soorlu tappiorannartut, aalisakkat, timmissat aamma miluumasut allat aamma ulorianartorsiortitaapput. Uumasoqatigiinni allanngortoqartillugu uumasut allat aamma nikittarput. Taamaalisoqaraangallu uumasoqatigiit kulturiat ukiorpassuarnilu pinngortitamiinneri aamma allamut pisarput.
- Illuatungaani uumasut allat nalinginnaasunik paarlaallutik pinngortitamiilersarput. Tassani makrelli assersuutissaavoq. Taava uagut Nunani Avannarlerni Killerni aalisakkanik taakkuninnga pisassanik aalajangersaanialerutta, nunanit allanit inupiluuserniartutullusooq isigineqartarpugut, nunanit tamakkuninnga uumasunik taakkuninnga qangali nalinginnaasunik atuisuusunit, Josef Motzfeldt.
- Kalaallit nunaanni soorunami aalisagarpassuarnik pisaqarnissatsinnut pisinnaatitaavugut, piujuartitsinissamik tunngaveqartumik aalisartoqartillugu. Kisianni nunat arlallit aalisakkat ataatsit aalisarpatigit qulakkeertariaqarparput taakkuninnga ingerlatsineq soqutigisallit tamarmik ataqqillugit ingerlanneqartariaqartoq, Josef Motzfeldt isumaqarpoq.
- Assigiimmik atugassaqartitaaneq aamma nunat assigiinngitsut akornanni ataqqeqatigiinnermut tunngassuteqarpoq, uagullu imartatsinni isumalluutinik atuinissamut immitsinnut tapersersoqatigiittariaqarpugut.
Tamanna tunngavigalugu Josef Motzfeldtip maanna Nunat Avannarliit Killiit Nunanut Avannarlernut attaveqarnera pillugu Nunat Avannarliiit Siunnersuisooqatigiivisa ingerlataannik ataatsimeersuartoqarnissaa siunnersuutigaa.