Jess G.: Asiamiut sumi najugaqarpat?

- Apeqqutiginngitsoorsinnaanngilara nunanit allaneersut soorlu asiamiut Nuummi akunnittarfinni neriniartarfinnilu sulisut sumi najugaqarnersut, tamatta ilisimallutigu Nuummi inissaaleqineq taamak annertutigisoq.

- Inissiani mikisuni quliullutik najugaqaqatigiippat? Imaluunniit sumiuna najugaqartut?

Taama oqarpoq SIK'p siulittaasua Jess G. Berthelsen Sermitsiaq.AG'mit apersorneqarluni.

Jess G. Berthelsenip tupigusunneranut aallaaviuvoq paasinarsimmat 2011 januaari aallarnerfigalugu filippinerit 81-it thailandimiullu 39-t Kalaallit Nunaanni imerniartarfeqarfinni sulilersimasut.

- Uagut SIK'mi ilaasortaatitagut soorunami inissiami imaluunniit illumi mikisumi allanik qulinik najugaqateqarlutik ineqarnissartik takorloorsinnaanavianngilaat.

- Soorunami uagut Nuummi ilaasortagut illoqarfimmi sulisariaqarput pitsaasunillu inissaqartinneqarlutik taamannalli ingerlatsisoqarsinnaanera ajornakusoorpoq taamak inissaaleqisoqartigitillugu. Ilaasortarpassuagut ilaqutaqarput qitornaqarlutillu tamatumalu nassataanik sineriammi sumut tamaanga nooqattaarsinnaanatik, naak suliffissaqarlunilu inissaqartoqassagaluartoq, Jess G. Berthelsen tikkuaavoq.

Isaaffik matuniarneqarpoq
-Illit SIK'mi siulittaasutut qanoq iliuuseqarsinnaannginnavit suliffissaaleqisut taamak amerlatigitillugit illuatungaani imerniartarfinni sulisut nunanit allaneersut amerliartuinnartut?

- Soorunami Nuup avataani illoqarfinni allani suliffissaqartitsiniarluni annerusumik iliuuseqartoqartariaqarpoq, suliffissaaleqinerup appartinneqarnissaa anguniarlugu. Namminersorlutik oqartussat aamma inatsisitigut putumik matusisariaqarput, taanna aqqutigalugu sulisitsisorpassuit nunanit allanit akikitsumik suliartortitanik soorlu Thailandimit aamma Filippinerinit tikisitsisarput, tamanna Danmarkimi Udlændingeservice aqqutigalugu periarfissaq atorneqartuarpoq, tamatuma kingorna namminersorlutik oqartussat qinnuteqartunut angiinnartarput Suliffissarsiuussisarfinnut saaffiginneqqaannguallarnatik.