Lottomi eqquisup kuponi alersersuarmut toqqorsimavaa

Danmarkip oqaluttuarisaanerani lottomi eqqugassanik amerlanerpaanik eqquisoq maanna nalunaarpoq - 135 millioner koruuninnalluni

Assi: Sermitsiaq.AG

Angut 50'ikkunni ukiulik Københavnip qeqqaneersoq.

Eqqugai ima amerlatigipput lottomik eqquisup qanigisai kisimik paasitinneqassallutik lottorsimasup tallimanngornermi Eurojackpot 135 millioner koruuninik imalik eqqornerata kingorna.

Eqquisoqarnerata kingorna tusagassiiviit arlalippassuit kina taamak iluatsitsilluartigaluni eqquisimanersoq paaniarsimagaluarpaat.

- Sullissivimmi suleqatima ilaat eqquisumit sianerfigineqarpoq kinaanerminik kalerriuteqartumit, Danske Spil-imi tusagassiinermik suliaqartoq Morten Hedegaard oqaluttuarpoq, taassuma qularutiginagu oqaatigisinnaavaa sianertoq asuliinnaanngitsoq kalerriuteqartoq.

- Kuponimi kisitsisit uppernarsaatit amerlasoorujussuit angutip suleqatitsinnut taagorsinnaavai taamaattumik qularutiginagu oqaatigisinnaavarput eqquisoq taannaasoq, Morten Hedegaard oqarpoq.

Kuponi alersersuarmut toqqorsimavaa
Danske Spilini ataqqineqartarpoq eqquisoq kinaassutsiminik isertuussiniaraanngat. Oqaatigineqarporli eqquisuulluni uppernarsigamiuk assut tupassimasoq.

- Piffissaq eqqarsarnissamut atortariaqarsimavara. Tupaqqagama. Maanna nukissannik katerseriarlunga saaffiginnippunga, angut Danske Spilini sulisumut oqarpoq.

Angutip eqquisimalluni paasigamiuk kuponi alersersuarmut toqqorsimavaa, taanna aalajangersimasumik Eurojackpot-ertartuuvoq eqqugaali Herlevimi napparsimavimmut pulaarnerminut atatillugu saniatigut pisariarisimallugu.

- Maannakkut nuannatissaagut. Kujataani inissiamik pisinissara eqqarsaatersuutigaara. Maani inissiara immaqa illumik taarsissavara, angut oqaluttuarpoq taassuma aamma aningaasat ilaat erniortinniassallugit isumaliutersuuteqarpoq.

- Børsen qangali pisartagaara aatsaat tassa nuannersiartulerpoq, angut oqarpoq aamma taassuma Danske Spil-it millionærinngortunut siunnersuisarnermik neqeroorfigineqarnerminut anngaasimavoq.

Powered by Labrador CMS