Siumut: Piniartut ataqqineqarlik
Biologit ilisimasaat naligalugit aalisakkanik piniagassanillu pisassiinerni tamani piniartut aalisartullu ilisimasaat pingaaruteqarput, Siumut nalunaarpoq, naalakkersuisooqatigiinnillu akerliliineq akuersaarneqarsinnaanngitsutut isumaqarfigalugu
Biologit ilisimasaat naligalugit aalisakkanik piniagassanillu pisassiinerni tamani piniartut aalisartullu ilisimasaat pinngitsoornatik ilaatinneqartalernissaannik illuatuingiliuttuni partiip angisuup siunnersuutaata naalakkersuisuutitaqartunit tapersersorneqannginnera Siumup politikkikkut siulittaasuata tulliata Karl Lyberthip naammaginngilaa.
Allaammi naalakkersuisooqatigiit siunnersuummik itigartitsinerat partiimit isumaqartinneqarpoq, partiit naalakkersuisuutitaqartut aalisartut piniartullu ilisimasaat biologit ilisimasaannit nalikinnerusutut isigigaat.
- Tamanna aalisartut piniartullu ilisimasaannik suusupaginninnertut ataqqinninngilluinnarnertullu akuerineqarsinnaanngilluinnartutut isigisariaqarpoq. Atuagarsorlutillu ”ilisimatuunngorsimasut” isumaannik taamaallaat ataqqinninnertut oqaatigisariaqarluni!, Karl Lyberth allappoq.
Taamaattorli oqarpoq, Siumut isumaqartoq, biologit ilisimasaat aamma saneqqunneqarsinnaanngitsut - kisianni aalisartut piniartullu ilisimasaannit pingaarnerutinneqartariaqanngitsut.
Pisassiinermi nungusaataanngitsumillu aalisarnermi biologit inassuteqaataasa tunngaviusarnissaat qinigaaffimmi matumani Naalakkersuisunit naalakkersuisooqatigiinnillu aalajangiusimaneqarpoq.