Kapisilinniarneq qaleralinniarnerlu unipput
Ukioq manna kapisilinniarneq unippoq. Upernaviup eqqaani sinerissap qanittuani umiatsiaararsorluni qaleralinniarneq tallimanngorpat naammassissaaq
Naalakkersuisut KNAPK-mik isumasiuillutinik aalajangerpaat ukioq manna kapisilinniarneq oktobarip 31-ni unnuap qeqqani naammassissasoq.
Piffissap aalisarfiusup naammassinerata kinguneraa qassutit tamarmik qaqinneqarnissaat. Aamma sunngiffimminni inuussutissarsiurigalugulu aalisartut kapisilittatik tamaasa nunatsinni aalisarnermik nakkutilliisoqarfimmut nalunaarutigissavaat. Nalunaarsuinermi immersugassat kommunimi nanoq.gl -ilu pissarsiarineqarsinnaapput.
Upernavimmi qaleralinniarneq aamma unitsinneqassaaq
Tallimanngornermi novembarip 2-ani Upernaviup eqqaani umiatsiaararsorluni qaleralinniarneq unitsinneqassaaq. Tamanna pissaaq Upernavimmi umiatsiaararsorluni pisaassat nungunneqarsimammata, nunatsinni aalisarnermik nakkutilliisoqarfik nalunaarpoq.