Sulisitsisut pisortat pisuutippaat
Suliffeqarfiit arlallit sulisussanik ilinniarsimanngitsunik pissarsiniarnertik ajornartorsiutigaat naak suliffissaaleqineq 1989-miilli aatsaat taama qaffasitsigaluartoq
Sulisussat nunanit allaneersut nunatsinnut takkusuuttuartut nunatsinni naatsorsueqqissaartarfiup kisitsisaatai naapertorlugit nunatsinni suliffissaaleqineq 1989-miilli aatsaat taama annertutigaaq.
Suliffeqarfiillu arlaqartut sulisussanik ilinniarsimanngitsunik nunatsinneersumik pissarsiniarnissartik ajornakusoortittarpaat naak ilinniarsimanngitsut akornanni suliffissaaleqineq annertugaluaqisoq.
Læs "Debat om udenlandsk arbejdskraft er ren følelsesporno"
Nunatsinnilu sulisitsisut Grønlands Arbejdsgiverforening naapertorlugit tamanna peqquteqarpoq pisortat sullissinerisa tunngaviatigut ajornartorsiutitaqarneranik:
- Ilimagineqarsinnaavoq isumaginninnerup iluani sulilernissamut kajumissuseqalersitsiniarneq naammanngitsoq, GA-p pisortaa Brian Buus Pedersen, avisen.dk-mut oqarpoq.
- Suliffissaaleqisut isorinianngilluinnarpakka, paasisarparpulli ilaasortavut ajornartorsiutinik imminnut assortuuttunik misigisaqartartut, oqarpoq erseqqisarlugulu Danmarkimut sanilliullugu suliffissaaleqisutut sulilernissamut pinaasernissaq nunatsinni ajornannginnerusoq.
Nunanit allamiunut aqutsisoqarfik naapertorlugu ingammik Asiamiit sulisussat nunatsinnut takkusuupput. Thailandimiit Filippineriniillu 110-t 2011-ip aallartinneraniit suliartorlutik takkussimapput septembarimilu suliffissaaleqineq 1989-miit aatsaat taama qaffasitsigaaq katillugit inuit 2.628 suliffissaaleqisutut nalunaarsorneqarsimallutik.