Meeqqat angajoqqaanik saqqumilaarnerusunik ujartuisut

Kalaallit meerartaat paasisitsiniaanersuarmi Nakuusamit aaqqissuunneqartumi killissanik amerlanernik eqqumaffigineqarnerunissamillu ujartuipput

Asseq: Nakuusa

Paasisitsiniaaneq 'Suli anaanamik! Suli ataatamik!' aappaagu marsip tungaanut meeqqat kaammattuuteqarnerisigut angajoqqaat akisussaaffiinik oqaluuserinniffiusoq Nakuusamit pilersinneqarpoq.

Paasisitsiniaaneq ilaatigut filminik arfineq-marlunnik Danmarkimi nunatsinnilu aallakaatinneqartussanik imaqarpoq, siullerlu ullumi DR Ramasjangimi aallakaatinneqassaaq.

- Meerartatta inuunitsinni pingaarnerpaanerannik oqaaseqarnissamut uagut inersimasut nangaanngisaannarpugut, kisianni oqaatsit kusanartut timitalernissaat ajornakusoorajuttarpoq. Ulluinnarni ulapaarfiusuni qano qililluni inersimasut eqqumaffiginnilersinneqarsinnaanerannik meeqqanik pingaarutilimmik oqaloqateqarnissamut filmit aallaavittut atorniarpavut, DR B&U-mi aaqqissuisoq Per Schouby oqarpoq.

Meeqqat namminneq kissaataat
Paasisitsiniaaneq 'Suli anaanamik! Suli ataatamik!' meeqqat namminneq angajoqqaat akisussaaffiannik oqaluuserinninnissamik kissaataannik aallaaveqarpoq. NAKUUSA Youth Forum Ilulissani 2011-mi ingerlanneqarmat suut pingaartillugit sammineqarnissaat meeqqat namminneq aalajangerlugulu oqaasertalerpaat, tamatumalu kingorna Kalaallit Nunaanni Meeqqat Isummersoqatigiiffianni juunimi 2012-imi angajoqqaat annerusumik pitsaanerusumillu akisussaaffeqalernissaannut inassuteqaatit tigussaasut qulit suliarineqarpoq.

Meeqqallu namminneq tunniusimanerat qitiulluinnarpoq, Unicef, namminersorlutik oqartussat peqatigalugu Nakuusamut tunuliaqutaasoq, nalunaarpoq.

- Paasisitsiniaaneq manna meeqqat sutigut tamatigut paasisitsiniaaneraat. Meeqqat kissaataat, pisariaqartitaat pisinnaatitaaffiilu paasisitsiniaanikkut naqissuserluarneqarput - meeqqat namminneq oqaasiinik. Meeqqaniit angajoqqaanut asanninnermik nalunaarutiginninneruvoq, nunamullu tamarmut siammarternissaanut qilanaartorujussuuvugut, Unicef Danmarkimi allattuuneq Steen M. Andersen oqarpoq.

Powered by Labrador CMS