Dronningi tikilluaqqujuk
Dronning Margrethe aqagu Nuummi Issittumi Sakkutooqarfimmik ammaajartorluni qanittukkut nunatsinnut tikissaaq
Dronning Margrethe ullumi nunatsinnut tikilluaqqorusukkukku periarfissaqarputit timmisartorsuarmut ilaalluni Kangerlussuarmut nal. 09.50 miss. tikippat imaluunniit nal. 11.15 Nuummut tikippat.
Dronningip nunatsinniinnerani pisussat aatsaat aqagu aallartissapput, Issittumi Sakkutooqarfik Nuummiittoq atoqqaartissagamiuk.
Tamanna pissaaq aqagu ullup-qeqqata siornatigut Nuummi piorsarsimassutsikkut illorsuarmi Katuami, tassanilu illersornissamut ministerimit illersornissamullu pisortamit tikilluaqquneqassaaq. Ullup-qeqqata kingorna ataqqinartorsuaq Issittumi Sakkutooqarfittaami takuniaatinneqassaaq ullorlu naggaserlugu neriniartarfimmi Nipisa nerersuaqatigiittoqassalluni.
Tikeraarneq pillugu annertunerusumik paasisaqarit Kunngikkormiut nittartagaanni.