Ajutoorneq politiinit misissorneqalerpoq
Politiinit ilisimatitsissutigineqarpoq arfininngormat annaassiniarnermut ajornakusoorluinnartumut atatillugu toqusoq tassaasoq angut 43-nik ukiulik
Arfininngormat Uummannap eqqaani annaassiniarnerup angutip 43-nik ukiullip uummarsarneqaraluarfiata kingorna pisoq ajunaarnermullu atatillugu pisimasut politiinit misissuiffigineqalerput.
- Paasiniaaneq eqqarsaatigalugu politiit maannamuugallartoq annertunerusumik oqaaseqarsinnaanngillat, vicepolitikommissær Poul Pedersen Kalaallit Nunaanni Politiit Annaassiniartarnermut Immikkoortortaqarfianeersoq oqaluttuarpoq.
Arfininngormat ualikkut inuit marluk Nuussuup imartaani politiinit annaassiniartartunillu qaqinneqarput. Angut 43-nik ukiulik ajoraluartumik sivitsunngitsoq toquvoq.
Læs "Én død – én overlevede kæntring"
Ipisimassagunartoq
Angutit marluk 43-nik aamma 45-nik ukiullit angallammi isikkanik 27-nik takissusilimmi arfininngornermi nal. 14.15 Aasiaat Radio aqqutigalugu Uummannap kitaani Nuussuup nuuata avataani ajunaalernermik kalerrisaarimmata annaassiniarneq aallartippoq. Air Greenlandip qulimiguuliutaa Sikorsky S-61 inuttaalu sisamat politiillu pingasut ilaasoralugit aallartinneqarpoq.
Annaassiniarneq nittaannerata, anorip sekundimut 25 meterinik sakkortussuseqartup taamalu malerujussuit kingunerisaannik ajornakusoorluinnarpoq.
- Inuit amoortaat atorlugu qulimiguulimmut ikineqarput, aappaa uumassuseqanngitsoq. Ikiueqqaarneq piaartumik aallartinneqarpoq. Pineqartut Uummannami napparsimmaviliaanneqarput tikinnermilu angut 43-nik ukiulik toqoreersimavoq, qularnanngitsumik ipilluni, Poul Petersen ilisimatitsivoq.
Toqusup ilaqutai ilisimatinneqareerput.