Internettimik atornerluisoqareersorlu mianersoqqusisut
Ilisimatusarfimmi universitetip internettimut attaveqaataa annertuumik atornerlunneqarsimavoq
- Internettimik aqutsinerput sukateriffigaarput atornerluineq sukkassutsimut sunniuteqarsimammat. Atornerluisimasut arlaqanngitsuinnaapput. Paasissutissanik annertoorujussuarnik inuttut nammineq atugassanik aallertoqarsimavoq, nittartakkallu unioqqutitsisumik agguataarisartut iserfigisinnaasimavaat.
Taama Ilisimatusarfiup rektoria Tine Pars knr.gl-imut oqaluttuarpoq.
Atornerluisimaneq tunngavigalugu Ilisimatusarfik mianersoqqussuteqarpoq:
- Internettimik sualuttumik atornerluisoqarnera malugineqarpat tamanna mianersoqqussummik atornerluinerullu kinguneranik universitetip aningaasartuuteqarnerussutigisimasaanut akileeqquneqarnermik malitseqartinneqarsinnaavoq. Arlaleriarluni taamaaliortoqarsimatillugu tamanna peersitaanermik nassataqarsinnaavoq. Atornerluineq pinerluuteqarnertut isikkoqarpat pisoq politiinut nalunaarutigineqassaaq, Ilisimatusarfik universitetimi internettimut attaveqaammik atuisunut tamanut allappoq.
Knr.gl allappoq, Ilisimatusarfiup inuit internettimut attaveqaammik atornerluisimasut attaveqarfigisimagai. Aamma ilinniartut, sulisut allalluunniit pineqarnersut oqaatigiumaneqanngitsoq.
Sermitsiaq.AG Tine Parsimut ilassutaasunik apeqquteqarpoq. Taanna akissutinut atorneqartussanik paasissutissanik pissarsiniarpoq.
Atornerluineq ilisimasaqarfigigukk taava tusarfigerusuppatsigit una aqqutigalugu: redaktion@sermitsiaq.ag