Tuluit oqaasiinik ilinniarneq qaffassarneqassaaq
Politikkikkut akisussaasoq Palle Christiansen Amerikamiut aallartitaannik Laurie S. Fultonimik ataatsimeeqateqareerluni isumalluarpoq
- Ajunngilluinnartumik ataatsimiippugut.
Taama ilinniartitaanermut, ilisimatusarnermut nunanillu avannarlernik suleqateqarnermut naalakkersuisoq Palle Christiansen, Demokraatit, Amerikamiut Danmarkii aallartitaannik Laurie S. Fultonimik ataatsimeeqateqareerluni inerniliivoq.
- USA-mik suleqateqarnitsinni suleqatigiissutigeriikkatta ilaat tassaavoq Joint Committee, ilaatigut Kangerlussuarmi aasaanerani tammaarsimaaqatigiinnermik ingerlatsiviusartoq. Ukiuunerani tammaarsimaqatigiittarnermik aamma pilersitsisoqarnissaa maanna sulissutigilerparput. Oqaatsinut tunngasuni aamma qanoq iliuuseqartoqarnissaa sulissutiginiarparput, tamatumanilu assersuutigalugu ilinniartuutitsinnik aasaanerani USA-mut tuluit oqaasiinik pikkorissariartitsisassalluta. Tamatuma peqatigisaanik USA-mit oqaatsinik ilinniartitsisunik maanga tikisitsisalernissaq sulissutiginiarparput, Palle Christiansen Sermitsiaq.AG-mut oqarpoq.
- Pilersaarutit oqaluttuarisatit qanoq tigussaatigippat?
- Tigussaasorujussuupput. Ingerlateqqitassavut kisiisa eqqartorpavut. Allat tamarmik asuli piffissaajaataassapput. Laurie (Laurie S. Fulton, aaqq.) oqaloqatigiuminartorujussuuvoq pineqartunillu ilisimasaqarluarluni. Tamatuma saniatigut nunarsuarmioqataanermik pingaartitsisuuvoq. Nunatta USA-llu akornanni toqqaannartumik isumaqatigiissutit uatsinnut pingaarutilerujussuusinnaapput, taakkunatigullu Issittup annertunerusumik isiginialernissaanut USA periarfissaqassalluni, Palle Christiansen oqaluttuarpoq.
Læs "Ambassadør roser studerende"
Læs "Studerende tog imod USA’s ambassadør"
Nunani avannarlerni suleqatigiinnermut ministerit peqatigalugit februaarimi Washingtoniliassaaq. Tamanna allamut atatillugu pissaaq, kisianni Laurie S. Fultonimik taamanikkussamut aamma Washingtonimiittussamik ataatsimeeqateqaqqinnissani Palle Christiansenip naatsorsuutigaa.
- Tamatumanilu ilinniartitaanermi ilisimatusarnermilu suleqatigiinnitta annertusinissaanik ataatsimoorussamik siunniussaqarneq atsioqatigiissutigineqarsinnaavoq, Palle Christiansen oqarpoq.