- Ulorianartuusoq eqqarsaatiginngilaa
Sapaatip akunnerani kingullermi blok P-mi ajutoortoqarnerani Christian "Lillu" Duelund siullersaalluni takkuppoq. Takkuteqqaartutut oqaluttuaa atuaruk
Sapaatip akunnerani kingullermi blok P assaassuarmut 57-inik ukiulimmit maskinførerimit Frede Bojemit ingerlanneqartumut uppimmat Christian "Lillu" Duelund, Godthåb Transportservice-mi sulisoq, meterialunnguanik ajutoorfiup eqqaaniippoq.
Blok P-p isuata uppinnerata kingorna sekundialunnguit qaangiuttut Christian Duelundip ajutoorfik arpaannaq ornippaa qarmat sanaartornermilu atortut allat akornisigut.
Atuaruk "- Nuummiunut tamanut qujanarsuaq"
Blok P-mi ajutoornermit assit takukkit uani
- Ulorianartoqarnera eqqarsaatiginngivippara. Sapinngisannik sukkanerpaamik qisuariaannarpunga, taanna Sermitsiaq.AG-mut oqaluttuarpoq.
- Eqqarsaannarpunga tikikkukku nuanniitsumik takusaqassallunga, arpaannarpungali, taanna oqaluttuarpoq.
-Isumaqarsimavungami taamatut ajutoornermi annannavianngitsoq.
Attaveqarfigisinnaanngilaa
Christian Duelundip ajutoorfik tikikkamiuk assaassuit aquttarfiat Frede Bojeluunniit takusinnaanngilai, takuinnarpaa qarmat akornanni qaamaneqartoq.
Atuaruk "Tupinnaqaaq uumagama"
Minutsi ataaseq marlulluunniit qaangiuttut Frede Boje, aquttarfimmi kiggutsissimasoq, attaveqarfigaa.
- Qanoq oqarnera eqqaamanngilara, oqaluutilerparali ajunnginnersoq tusarniarlugu.
Ilisarisimareerpaa
Tamatuma kingorna Christian Duelund suleqatini ikiortigalugit ambulancemik qaaqqusivoq - kingornalu Frede Boje annaanneqarpoq Danmarkimullu aallarunneqarluni qimerlumigut ajoqusersimammat.
Christian Duelundip Frede Boje, isaterinermik entreprenørimi Kingo Karlsen-imi sulisoq, suleqatiginngikkaluarlugu ilisarisimavaa, arlaleriarluni suleqatigisarsimagamiuk.
Ullumikkut ajutoornerup kingorna sapaatip akunnera qaangiuttoq Christian Duelundip Frede Boje suli oqaloqatigisinnaasimanngilaa.
MIsigisalli sakkortuup nalilersornissaanut piffissaqarsimavoq.
- Nuannaarutigaara annammat - neriuinnassaanga ataavartussamik ajoqusersimanngitsoq, Christian Duelund oqarpoq.i
Blok P-p uppiffigimmani Frede Bojep aaverluni toqunissani annilaanngatigisimavaa. AG-mi sapaatip akunnerani saqqummersumi betonit ataaniinnini minutsit pissanganartut oqaluttuarai. Aviisi pisiariuk uani: