Aatsitassanik piiaaffiit peqqinnissaqarfimmik tatisissapput
Suliniussuit assersuutigalugu Isukasia Maniitsullu eqqaaniittoq akuersissutigineqassappata peqqinnissaqarfik tatineqalissaaq, naalakkersuisoqarfimmi pisortaq oqarpoq
Suliniussuit, soorlu Isukasiani saviminissamik piiaaffik Maniitsullu eqqaani aluminiumik aatsitsivik, akuersissutigineqassappata tamanna peqqinnissaqarfimmut kinguneqanngitsoornavianngilaq. Taamatut Nuuk TV-mut oqarpoq Peqqissutsimut Naalakersuisoqarfimmi pisortaq Ann Birkekær Kjeldsen.
- Nutaanik ingerlatsisorujussuaqaleriataarpat innuttaasunik amerlisitsisunik peqqinnissaqarfimmit sullinneqartussanik, soorunami peqqinnissaqarfik tatineqassaaq, Ann Birkekær Kjeldsen Nuuk TV-mut oqarpoq, erseqqissaallunilu suliniutit akuersissutigineqassappata nakorsanik amerlanerusunik atorfinitsitsisoqartariaqassasoq.
- Uagutsinnummi pingaarnertut anguniagaavoq nunami maani innuttaasunik peqqissutsimik sulineq ajorseriassanngitsoq, inuit peqqinnissaqarfimmit passunneqartussat amerlippata, taanna oqarpoq.