Radio aallakaatitseqqilerpoq aningaasaqarneq paatsiveqanngikkaluartoq
Aningaasaqarnikkut ajornartorsiortorujussuugaluarluni Radio Ilulissat aallakaatitseqqilerniarpoq - aqagu aallakaatitseqqittaleriissaaq
Sapaatit akunnerini kingullerni marlunni Radio Ilulissat-mik naalaartartut illoqarfiup radioa naalaarsinnaasimanngilaat. Aqagumiilli, tallimanngornermit, radio aallakaatitseqqilissaaq, taamatut allappoq KNR.
Radioqarfik aallakaatitseqqittalerniarpoq 400.000 koruuninik akiligassaqaraluarni.
Tamanna qanittukkut ataatsimeersuarnermi aalajangiunneqarpoq:
- Naatsorsuutigaarput tallimanngorpat arfininngorpallu aallakaatitseqqilissalluta. Siulersuisunik nutaanik ivertitsisoqarpoq, sulissutigaarpullu peqatigiiffiup uppernarnerulernissaa, Edvard Geisler, Radio Ilulissat siulersuisuini ilaasortaagallartoq, KNR-mut oqarpoq.
Akisussaaffik inissinneqassaaq
Tamanna peqatigalugu siulersuisuugallartut allamik unammilligassaqarput. Tassami qulaajarneqassaaq aningaasaqarnerup paatsiveqannginnerujussuanut, aallakaatitsisarnerup unitsikkallarneranik kinguneqartumut, akisussaasoqartitsisoqarsinnaanersoq:
- Ataatsimiinnermi peqataasut ilaatigut aalajangerput misissorneqassasoq peqatigiiffiup aningaasaqarnerlunnersuanut akisussaatitsisoqarsinnaanersoq, Edvard Geisler oqarpoq.