Singernikkut nalunaarsuuteqartoqassava imaluunniit
Inatsisartuni partiit amerlanerit singernermikkut nalunaarsuuteqarluni angerlarsimaffimmi pineqaatissinneqartalernissamik siunnersuut akueraat. Taamaallaat Demokraatit apeqqusiipput
Nunatsinni pinerluttarnerit annikillisinniarlugit inissiisarfinnillu utaqqisut ullumikkut 300 missaanniittut ikilisarniarlugit Siumut sinnerlugu Inatsisartunut ilaasortat Doris Jakobsen Kristian Jeremiassenilu ataasinngormat oktobarip 22-ani Inatsisartuni aalajangiiffigisassamik siunnersuuteqarput naalakkersuisut piumaffigineqassasut Danmarkimi inatsisinut atortitsinermut ministeri attaveqarfigissagaat singernikkut nalunaarsuuteqarluni angerlarsimaffimmi pineqaatissinneqarsinnaanerup eqqunneqarnissaa siunertaralugu.
Inuit Ataqatigiit, Siumut, Kattusseqatiit Partiiat Atassullu siunnersuummik tapersersuipput siunnersuullu ataatsimiititaliamut ingerlateqqillugu.
Demokraatit siunnersuut itigartippaat 2007-milu Inatsisinut atortitsinermut ministereqarfiup akissutaa innersuussutigalugu, taamanikkut Astrid Fleischer Rex taamatorpiaq naalakkersuisunut apeqquteqarmat.
2007-miit suut allanngoramik?
Inatsisinik atortitsinermut ministerip akissutigaa Eqqartuussiveqarnikkut ataatsimiititaliarsuarmi ataatsimut isigalugu nalilerneqarmat Kalaallit Nunaanni singernikkut nalunaarsuuteqarluni angerlarsimaffimmi pineqaatissinneqartarnissaq innersuussutiginanngitsoq, taamaattorli aningaasatigut teknikkukkulluunniit periarfissaqalerpat atuutilernissaa akerlerinagu, piumaneruaallu inuiaqatigiinni sullissilluni pineqaatissinneqartarnissaq, taannami kingusinnerusukkut 2009-mi pinerluttulerinermik inatsit nutaaq atulermat periarfissaqalerpoq.
Misilittakkat pitsaasut
Taamatut siunnersuuteqarnermut tunngavilersuutigineqarpoq Inatsisartuni Inatsiseqarnermut ataatsimiititaliami aammalu Folketingimi Inatsiseqarnermut ataatsimiititaliami singernikkut nalunaarsuuteqartarneq nunani assigiinngitsuni misilittagaasoq misissuiffigineqarsimammat misilittakkallu tamarmik pitsaasumik kinguneqartarsimallutik. Ataatsimut inerniliineq tunngavigalugu singernikkut nalunaarsuuteqarneq pinerluttartut utikaajaarnerannik annikillisitsisarpoq, nutaamik pinerloqqissinnaaneq annikillisittarlugu.
Aamma ilaqutaasut eqqorneqarnerat annikillisinneqartarpoq, meeqqat angajoqqaamik pinerlussimanerat tunngavigalugu ujariatsinnginnissaat anguneqartarluni.
– Una siunnersuut siunertaqarpoq inuiaqatigiit akornanni pinerluttarnerup ataatsimut isigalugu annikillisinneqarnissaanik. Aamma pitsaasumik sunniuteqarsinnaavoq paarnaarussivinnut utaqqisut ikilisinneqarnerannik. Siunnersuutip atuutsinneqalerneratigut maannakkut pineqaatissinneqarsimallutik utaqqisut ilai neqeroorfigineqarsinnaanngussapput singernikkut nalunaarsuuteqalernissaannik paarnaarussivimmut isertinneqarnissaannut taarsiullugu, Doris Jakobsen Kristian Jeremiassenilu tunngavilersuipput.
Naalakkersuisut siunnersuut tapersersorpaat novembarilllu 13-ani aappassaaneerneqassaaq.