Sarfaq Ittuk amutsivimmi
Umiarsuaq ilaasortaat ajutuukulasoq kiisami suliarineqalerpoq
Arctic Umiaq Linep sinersortaataa Sarfaq Ittuk Nuummi nunaliaanneqarpoq - Nuummi amutsivimmi suliarineqassalluni sapaatip akunneri marluk matuma siorna Qaqortumi Nuummilu ajutoornermi kingorna.
Sermitsiaq.AG'p paasissutissaatai naapertorlugit umiarsuup nunaliaanneqarnera nalunaaqquttap akunnerini arfinilinni ingerlanneqarpoq.
Sarfaq Ittuup aquutaa aamma aquuteqarfimmigut ajoqquseqqavoq taakkualu maanna iluarsaanneqartussanngorput, kisianni aquutaa umiarsuup umiarsualivimmi taleqqanerata nalaani piiarneqarpoq.
Arctic Umiaq Line siornatigut nalunaarpoq Sarfaq Ittuup angalanissamik pilersaarutai novembarip 20-ata tungaanut ajutoornerit pissutigalugit taamaatinneqartut, tamatumali kingorna - ajutoortoqaqqinngippat - umiarsuaq angalaqqilissasoq.