Qipoqqaq qassutini
Akunnaani qipoqqaq toqunneqarpoq. Neqitaa nunaqarfimmi innuttaasut utoqqartaannut agguaanneqassaaq
Qipoqqaq 12-13 meterisut takissusilik ulluni marlunni Nivaap eqqaani kapisilinnut qassutini napittoq aniguiniarsarigaluarpoq. Tallimanngornermi aalajangerneqarpoq qipoqqaq toqunneqassasoq.
Qaasuitsup Kommuniani aalisarnermut piniarnermullu suliassaqarfimmi pisortaagallartoq Pâviâraq Jakobsen, oqaluttuarpoq: - Qassutinut nermussimagami. Talerui tamarmik timaanut attuullutik sukarunneqarsimapput taamalu paperuni kisiisa atorlugit aalasinnaalluni. Ulluni marlunni napissimareerluni arfeq aamma qasulluinnarsimavoq.
- Neqi utoqqarnut pisortallu suliffeqarfiutaannut Akunnaami agguaanneqassaaq. Qassutinik piginnittoq annaasaminut taarsiissutitut neqimik pissarsissaaq. Taamatuttaaq umiatsiaaqqat 13-it qipoqqarmik Akunnaamut kaleqataasut neqimik pissarsiumaarput, Pâviâraq Jakobsen KNR-mut oqarpoq.
Pinngortitaleriffik, Qaasuitsup Kommunia aamma namminersorlutik oqartussat ilisimatinneqareerput.